Elimizde gandbol qarqyndy damýda jáne onyń dárejesi jyldan-jylǵa kóterilýde - Ǵ. Mýrsaeva
ALMATY. 2 qarasha. QazAqparat /Názıra Eleýhan/ - "Aýyspaly trofeı" jarysynyń qurlyqtyq Kýbogy Qazaqstanda tuńǵysh ret ótkizilgeli otyr.
Bul týraly búgin Almatyda halyqaralyq gandbol federatsııasynyń qurlyqaralyq "Aýyspaly trofeı" saıysynyń bastalýyna oraı ótkizilgen arnaıy baspasóz máslıhatynda aıtyldy.
Gandboldan Qazaqstan qurama komandasynyń aǵa jattyqtyrýshysy Lev Ineevtiń aıtýynsha, qurylqtyq Kýboktyń bizdiń elde ótkizilýi, elimizde gandbol sportynyń damyp jatqandyǵynyń aıǵaǵy.
Esterińizge sala ketsek, atalmysh jarys búgin Almatyda B.Sholaq atyndaǵy Sport saraıynda keshkisin bastalady. Oǵan Qazaqstan, Kongo, Kýba jáne Fınlıandııa komandalary qatysady. Qurlyqtyq dárejedegi saıys 21 jasqa deıingi qyzdar arasynda ótedi. Bul "Aýyspaly trofeı" jobasy 2010 jyly bastalǵan bolatyn. Jobanyń maqsaty - áıelder men erler komandalary oıynshylarynyń sheberlikterin shyńdaý jáne jattyqtyrýshylardyń, dene shynyqtyrý páni oqytýshylary men tóreshileriniń biliktiligin kóterý bolyp tabylady.
Komanda jattyqtyrýshysynyń aıtýynsha, bizdiń qurama komanda oıynǵa saqadaı-saı. «Bizdiń maqsatymyz jaqsy oınaý. Sondyqtan bizdiń qyzdar baryn salýǵa daıyn», - dedi L.Ineev.
Almaty qalasynyń shtattyq ulttyq qurama komandasy dırektsııasynyń múshesi Ǵaınıjamal Mýrsaevanyń aıtýynsha, búginde elimizdiń ár aımaǵynda gandbol qarqyndy damýda. «Gandbol sportynyń dárejesi de jyldan-jylǵa kóterilip keledi. Oıynshylarymyz úshin barlyq jaǵdaılar jasalýda. Jattyqtyrýshylarymyz da jetkilikti. Federatsııa gandboldy damytý úshin úlken jumystar atqarýda. Úsh jyldan beri jylyna eki ret sheteldik, atap aıtqanda eýropalyq jattyqtyrýshylardy tartyp, jattyqtyrýshylarymyzdyń biliktilikterin arttyrý úshin jáne oıynshylarymyzdyń sheberlikterin shyńdaý úshin dárister, túrli semınarlar uıymdastyrýda. Endi jyldan-jylǵa tájirıbe jınaqtap kele jatqan gandbol, tek alǵa qaraı damı berýi tıis», - dep atap ótti ol.
