Elimizde fermerlerge sýbsıdııa bólý salasynda qandaı ózgerister bolady
«Memleket basshysy agroónerkásiptik keshendi memlekettik qoldaý tásilderin fermerler qaýymdastyǵymen birlese otyryp qaıta qaraýdy tapsyrdy. Bul rette, sýbsıdııalaý júıesin jetildirý boıynsha kelesideı naqty mindetter qoıyldy: shaǵyn jáne orta sharýashylyqtarǵa sýbsıdııalardy jeńil tártipte berý, olardy alý rásimderin jeńildetý jáne avtomattandyrý, sýbsıdııa alýshylar úshin tıisti mindettemelerdi engizý, sondaı-aq sýbsıdııalaý júıesin memlekettiń ónerkásiptik saıasatymen ózara baılanystyrýdy qamtamasyz etý. Sondaı-aq, Memleket basshysynyń tapsyrmasy aıasynda QR Sybaılas jemqorlyqqa qarsy is-qımyl agenttiginiń bastamasy boıynsha Aýyl sharýashylyǵyn sýbsıdııalaý salasyna keshendi taldaý júrgizildi. Onyń qorytyndysy boıynsha Mınıstrlikke sýbsıdııalaý júıesin jetildirý boıynsha 170-ten astam usynys jiberildi», - dedi R. Qurmanov Májiliste agrarlyq máselelerdi talqylaý kezinde
Onyń aıtýynsha, sýbsıdııalaý júıesindegi kemshilikterdi joıý, sondaı-aq salany odan ári jetildirý maqsatynda Mınıstrlik Agroónerkásiptik keshendi memlekettik qoldaýdyń tıimdiligin arttyrý jónindegi jumys tobyn qurdy. Onyń quramyna salalyq qaýymdastyqtar men odaqtardyń, agrobıznestiń, ǵylymnyń, múddeli memlekettik jáne jergilikti atqarýshy organdardyń ókilderi, Parlament depýtattary kirdi. Jumys tobynyń 9 otyrysy ótkizilip, onda sýbsıdııalaý júıesin jetildirý tásilderi talqylandy. Jumys toby qyzmetiniń qorytyndylary boıynsha qoldanystaǵy sýbsıdııalaý júıesiniń negizgi kontýrlaryn saqtaı otyryp, sybaılas jemqorlyq táýekelderin tómendetýge baǵyttalǵan tıisti ózgeristerdi qamtıtyn nusqasy ázirlendi.
«Endi qysqasha ishki salalardaǵy memlekettik qoldaýdyń negizgi ózgeristerine toqtalyp óteıin. Qarajat boıynsha sýbsıdııalaýdyń barlyq baǵyttary qalady. Qaryz alýshy úshin mólsherlemeni jyldyq 6%-ǵa deıin tómendete otyryp, kredıt pen men lızıng boıynsha syıaqy mólsherlemesin sýbsıdııalaý eskerilgen. Osy oraıda tıisti erejeler qazirdiń ózinde bekitilgen. Saqtandyrý premııalaryn sýbsıdııalaýǵa toqtalsaq, byltyr normatıvti 50%-dan 80%-ǵa deıin ulǵaıtý boıynsha saqtandyrý syılyqaqylaryn sýbsıdııalaý qaǵıdalaryna ózgerister engizildi. Saqtandyrý premııasyn sýbsıdııalaý normatıvin 80%-ǵa deıin ulǵaıtý jaýynsyz mezgilder qaıtalanǵan kezde aýyl sharýashylyǵy taýaryn óndirýshilerdiń qarjylyq qıyndyqtaryn jeńildetý boıynsha jaǵdaı jasaýǵa, kredıtti qaıtarmaý táýekelin tómendetýge, sondaı-aq saqtandyrý polısin arzandatýǵa jáne saqtandyrylǵan egis alqaptaryn keńeıtýge ári mal men qusty saqtandyrýdy kóbeıtýge múmkindik beredi», - dedi vıtse-mınıstr.
Onyń sózine qaraǵanda, ınvestıtsııalyq sýbsıdııalaýdyń barlyq túrleri men baǵyttary júıelengen. Jalpy, ınvestıtsııalyq sýbsıdııalaýdyń barlyq túrleri saqtalady.
«Budan bólek, oblystyq qurylys jáne sáýlet basqarmalarynyń qyzmetkerlerin jańadan salynǵan nysandardy tekserý jónindegi mamandar tobyna qosý týraly mindetti talapty eskere otyryp, qurylys-montajdaý jumystaryn sýbsıdııalaý saqtalady», - dedi R. Qurmanov.
Munymen qosa, iri qara malǵa arnalǵan qoldanystaǵy bordaqylaý alańdarynyń tolyǵýy shamamen 40 paıyzdy quraǵanyn eskere otyryp, osy oraıda jańa bordaqylaý alańdaryn salýǵa qatysty sýbsıdııalaýdy alyp tastaý jáne qoldanystaǵy bordaqylaý alańdaryn tehnıkalyq ári tehnologııalyq qaıta jaraqtandyrýǵa qarajatty qaıta baǵyttaý usynylyp otyr.
«Jaıylymdarǵa sý burý úshin uńǵyma burǵylaý men qudyq qazý baǵytyna qatysty elektr stantsııasy (benzın nemese dızel generatory) jáne sýdy shyǵarýǵa arnalǵan jabdyqtar qunyn sýbsıdııalaý joıylady. Sebebi bul salada sybaılas jemqorlyq táýekelderi baıqalyp otyr. Olardyń naryqtyq quny stantsııalar men jabdyqtardy óndiretin elderge baılanysty ondaǵan ese ózgeredi. Bul turǵyda jabdyqtyń arzan túrlerin jetkizip, jeke adamdar taýar qunyn ósirip, sýbsıdııalardyń qomaqty somasyn ala alady. Bul rette osy pasport boıynsha ınvestıtsııalyq salymdardy óteý úlesin 50-den 25%-ǵa deıin tómendetý usynylyp otyr», - dedi mınıstrlik ókili.
Atap aıtqanda, kókónis ósirýdi ulǵaıtý maqsatynda jylyjaı keshenin salý jáne keńeıtý boıynsha ótemaqy úlesi 25%-dan 30%-ǵa deıin ósedi. Bul óz kezeginde maýsymaralyq kezeńde azyq-túlik qaýipsizdigin qamtamasyz etýge múmkindik beredi. Sondaı-aq, jemis-jıdek, júzim otyrǵyzý boıynsha ınvestıtsııalyq salymdardy óteý úlesin 25%-dan 40%-ǵa deıin ulǵaıtý týraly sheshim qabyldandy.
Sonymen qatar, mal sharýashylyǵy salasynda asyl buqalar men qoshqardy jalǵa alýdy sýbsıdııalaý joıylady.
Sýda júzetin qus pen kúrketaýyq etin sýbsıdııalaý da toqtatylady. Óıtkeni olar áleýmettik mańyzy bar azyq-túlik taýarlaryna jatpaıdy.
«Qus sharýashylyǵy boıynsha jumyrtqaǵa 3 teńge sýbsıdııa normatıvimen osy baǵytta sýbsıdııalaýdy jalǵastyrý usynylyp otyr. Buqa men qoshqardy bordaqylaýǵa jáne et kombınattaryna tapsyrý boıynsha sýbsıdııalaý normatıvteri ózgerissiz qalady. Jem-shóp salasynda sýbsıdııalaý boıynsha normatıvteri men sýbsıdııalar alý krıterııleri ǵylymı uıymdardyń usynymdary negizinde jergilikti atqarýshy organdardyń qaýlysymen bekitiledi», - dedi vıtse-mınıstr.
Onyń atap ótýinshe, qazirgi kezde sýbsıdııalaý qaǵıdalarynyń jobalary memlekettik organdarda kelisýden ótip jatyr.
