Elimizde eski avtobýstardy tirkeý tártibi ózgeredi
NUR-SULTAN. QazAqparat – Májilistiń jalpy otyrysynda shyǵarylǵan ýaqyty 10 jyldan asqan avtobýstardy bastapqy memlekettik tirkeýge tyıym salý normasy túsindirildi, dep habarlaıdy QazAqparat tilshisi.
Jalpy otyrysta jol júrisi máseleleri boıynsha zań jobasynda 10 jyldan asatyn avtobýstardy bastapqy tirkeýge tyıym salý kózdelgeni aıtyldy.
«Bul norma bizdiń kóptegen azamattarymyzdyń, ásirese, aýyldyq jerlerde turatyndardyń múdellerin qozǵaıdy. Jasyratyny joq, keıbir aımaqtarda jolýshylardy eski avtobýstarmen tasymaldaıdy. Tipti, ótken ǵasyrdyń 80-shi jyldary shyǵarylǵan avtobýstar da bar. Osy normany qabyldaý eski avtobýstardy paıdalanýǵa bolmaıtyn jaǵdaıǵa alyp kelmeı me?», - dep surady depýtat Fahrıddın Qarataev.
Óz kezeginde Májilis depýtaty Qanat Mýsın bul ózgeris elimizdegi jolaýshylar tasymalyna eshqandaı kedergi keltirmeıtinin aıtty.
«Qazir paıdalanýda júrgen avtobýstarǵa qatysy joq. Bul ózgeris tek birinshi ret Qazaqstanǵa alyp kelgen, alǵash tirkeýge qoıylatyn avtobýstarǵa baılanysty. Sebebi avtobýstardyń kóbisi eski, osynyń saldarynan apattar jıilep ketedi. Sondyqtan tıisti norma engizilip otyr», - dedi Q. Mýsın.
Aıta keteıik, Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine jol júrisi máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
Qujatta shyǵarylǵan ýaqyty 10 jyldan asqan avtobýstardy bastapqy memlekettik tirkeýge tyıym salý eskerilgen.
