Elimizde esirtkimen kúreske baǵyttalǵan qarjy tıimsiz jumsalyp kelipti - Bas prokýratýranyń tekserýi
ASTANA. Sáýirdiń 8-i. QazAqparat /Aıdar Ospanalıev/ - «Qazaqstanda esirtkige qarsy baǵyttalǵan baǵdarlamaǵa bólingen qarjy durys úlesterilmegen», dedi búgin Bas prokýratýranyń resmı ókili Nurdáýlet Súıindikov,
dep habarlaıdy QazAqparat.
Onyń sózine qaraǵanda, nashaqorlyqpen baılanysty jaǵdaıdy saýyqtyrý sharalaryna jalpy bólingen somanyń tek 30 paıyz ǵana jumsalǵan. «Atalmysh fakti qoǵamdyq dertpen kúres baǵytynda memlekettik organdar qoldanyp otyrǵan sharalardyń tıimsizdiginiń basty sebepteriniń biri», dedi resmı ókil.
Onyń aıtýynsha, nashaqorlyqpen kúreske baǵyttalǵan qarjyny quzyrly organdar tıimdi paıdalana almaı otyr. «Mysaly www.narkopost.kz degen ataýmen qurylǵan ınternet saıtynda jarııalanǵan málimetter uzaq ýaqyt boıy jańartylmaǵan. Al saıttyń aıdarlary jarnamalar men spamdarǵa toly. Osynyń ózi atalmysh saıttyń tek kózboıaýshylyq úshin qurylǵandyǵyn, ıaǵnı qarjynyń tıimsiz qoldanylǵandyǵyn kórsetedi. Buǵan qosa nashaqorlyqtan emdelip shyqqan azamattardy beıimdeý máselelerine de jetkilikti kóńil bólinbeı otyr. Al olardy jumyspen qamtý máseleleri nashaqorlyqpen kúres baǵdarlamasynda múldem qarastyrylmaǵan», dedi N.Súıindikov.
Onyń aıtýynsha, osy ýaqytta esirtkimen kúreske baǵyttalǵan qarjynyń ıgerilýin qadaǵalaý boıynsha júrgizilgen tekserýler kezinde anyqtalǵan kemshilikterdi joıý úshin arnaıy usynys daıyndalýda.
