Elimizde epıdemıologııalyq ahýal turaqty - vıtse-mınıstr
«Qazaqstanda ınfektsııalyq aýrý túrleriniń basym kópshiligi boıynsha epıdemıologııalyq ahýal turaqty. Dese de, Almaty qalasy men Almaty oblysynda menıngokok ınfektsııasyna shaldyǵý jaǵdaıy tirkeldi. Alaıda ýaqtyly júrgizilgen is-sharalardyń arqasynda atalmysh ınfektsııa boıynsha jaǵdaı turaqtandyryldy», - deıdi Alekseı Tsoı.
Vıtse-mınıstr 2018 jyldyń 30 maýsymynan bastap menıngokok ınfektsııasyna shaldyǵý jaǵdaıy birli-jarym ǵana kezdesetinin atap ótti.
«Qazaqstan Respýblıkasyndaǵy menıngokok ınfektsııasynyń kópjyldyq ortasha deńgeıi 100 myń halyqqa eseptegende 2,1 kórsetkishin kórsetedi. Búgingi tańda Qazaqstanda bul ınfektsııaǵa shaldyǵý deńgeıi 100 myń halyqqa eseptegende 0,5 qana. Atalmysh kórsetkish kópjyldyq deńgeıden tórt ese az ekenin aıta ketý kerek», - deıdi ol.
Densaýlyq saqtaý mınıstrliginiń ókili sonymen birge tumaý men JRVI (jedel respıratorlyq-vırýstyq ınfektsııalary) aýrýlarynyń maýsymdyq kezeńge baılanysty artqany baıqalǵanyn aıtty.
«Atalǵan ınfektsııalar boıynsha da jaǵdaı turaqty. Tumaýdyń «A» vırýsy men paragrıpp, rıno vırýs, adenovırýs vırýstarynyń tsırkýlıatsııasy anda-sanda kezdesedi», - dedi Alekseı Tsoı.
Eske sala ketsek, OKQ-da ótken baspasóz máslıhatynda QR Densaýlyq saqtaý mınıstrligi Qoǵamdyq densaýlyq saqtaý komıtetiniń tóraǵasy - bas memlekettik sanıtar dárigeri Jandarbek Bekshın turǵyndar mindetti túrde qyzylshaǵa qarsy ekpe jasatýy kerektigin habarlaǵan bolatyn.