Elimizde energııa únemdeýdi kózdeıtin zań jobasynyń tujyrymdamasy ázirlendi
ASTANA. QazAqparat - Elimizde energııa únemdeý jónindegi zań jobasynyń tujyrymdamasy daıyn boldy. Tujyrymdama energııa únemdeýdiń qoldanystaǵy tetikterin jetildirýdi kózdeıdi, dep habarlaıdy QazAqparat tilshisi.
«Memleket basshysynyń 2018 jylǵy 10 qańtardaǵy Qazaqstan halqyna Joldaýynda kásiporyndarǵa energııa tıimdiligi talaptaryn jetildirý tapsyrylǵan bolatyn. Osy tapsyrmany oryndaý úshin «Energııa únemdeý jáne energııa tıimdiligin arttyrý týraly» zańǵa tájirıbelik taldaý júrgizildi. Bul rette múddeli taraptarmen birlesip, tıisti zań jobasynyń tujyrymdamasy ázirlendi («Qazaqstan Respýblıkasynyń keıbir zańnamalyq aktilerine energııa únemdeý jáne energııa tıimdiligin arttyrý máseleleri boıynsha ózgerister men tolyqtyrýlar engizý týraly»)», - dedi QR Investıtsııalar jáne damý mınıstri Jeńis Qasymbek búgingi Úkimet otyrysynda.
Mınıstrdiń aıtýynsha, tujyrymdama energııa únemdeýdiń qoldanystaǵy tetikterin jetildirýdi (memlekettik energetıkalyq tizilim, energııa aýdıtorlyq qyzmet, memlekettik baqylaý), jeke jáne memlekettik sektorlardy retteý tásilderin ózgertýdi, sondaı-aq energııa únemdeýdi yntalandyrý sharalaryn ázirleýdi kózdeıdi.
«Energııa únemdeý salasy boıynsha qoıylǵan mindetterge qol jetkizýdiń negizgi sharalary joǵaryda atalǵan zań jobasynyń tujyrymdamasy aıasynda qaralady», - dedi mınıstr.
