Elimizde energııa tıimdiligin arttyrý jobasy aıasynda 75 nysan qaıta jóndeldi

NUR-SULTAN. QazAqparat - «Qazaqstanda energııa tıimdiligin arttyrý» jobasy aıasynda 75 áleýmettik mańyzy bar nysanda qurylys-montaj jumystary júrgizildi, dep habarlaıdy QazAqparat QR IIDM Indýstrııalyq damý jáne ónerkásiptik qaýipsizdik komıtetine silteme jasap.

Joba Dúnıejúzilik bank pen QR Úkimeti arasyndaǵy grant týraly kelisim aıasynda júzege asyrylýda. 21,7 mln AQSh dollar grant qarajatyn Dúnıejúzilik banktiń ákimshilik etýimen Trast qory arqyly Shveıtsarııanyń Damý jáne Yntymaqtastyq agenttigi usynǵan.

Jobanyń Atqarýshy agenttigi «Elektr energetıkasyn damytý jáne energııa únemdeý ınstıtýty» AQ. Instıtýttyń Basqarma tóraǵasy Baýyrjan Smaǵulov Dúnıejúzilik banktiń Qazaqstandaǵy Turaqty ókili Jan-Fransýa Martomen kezdesti. Jıyn barysynda energııa únemdeý salasyndaǵy MJÁ máseleleri jáne osy quraldy damytýdyń mańyzdylyǵy talqylandy.

«Elektr energetıkasyn damytý jáne energııa únemdeý ınstıtýty» AQ mamandarynyń derekteri boıynsha, energııalyq tıimdi deńgeıine ótý múmkindigine mektepter, balabaqshalar men aýrýhanalar ıe boldy. Memlekettik mekemelerdi tańdaý konkýrstyq negizde júrgizildi.

Áleýmettik nysandarda energııa únemdeıtin terezeler ornatyldy, jylý jáne jaryq júıeleri jańǵyrtyldy, shatyry jóndeldi, qasbetter jylytyldy. Energomonıtorıng qorytyndysy boıynsha bir nysandaǵy jyldyq únemdeýdiń ortasha mólsheri jylý energııasy boıynsha 30%-dy jáne elektr energııasy boıynsha 15%-dy quraıdy. Sondaı-aq, grant qarajaty esebinen eldi mekenderdegi jekelegen kóshelerdi jaryqtandyrý júıesin jańǵyrtý boıynsha jumystar júrgizý josparlanýda.

Búgingi kúni energııa únemdeý baǵytynda nátıjelerdi rastaý maqsatynda iske asyrylǵan barlyq jobalardyń energııa tutyný monıtorıngi júzege asyrylýda. Mysaly: Qaraǵandy qalasynda (№66 orta mektep) kishi joba boıynsha jylý energııasyn 25%-ǵa jáne elektr energııasyn 13%-ǵa únemdeýge, Aqtaý qalasynda (№54 balabaqsha) kishi joba boıynsha jylý energııasyn 16%-ǵa jáne elektr energııasyn 45%-ǵa únemdeýge qol jetkizildi.

Óz kezeginde, Dúnıejúzilik banktiń Qazaqstandaǵy Turaqty ókili Jan-Fransýa Marto joǵary energııa syıymdylyǵy ekonomıkalyq básekege qabilettilik, qoǵamdyq densaýlyq saqtaý jáne qorshaǵan orta turǵysynan el úshin eleýli shyǵyndarǵa alyp kelgenin atap ótti. Sondyqtan Qazaqstanda energııa únemdeý tehnologııalaryn engizý máselesi erekshe nazar aýdarýdy talap etedi. Nátıjesinde, taraptar energııa únemdeý salasynda odan ári yntymaqtastyq pen jańa birlesken jobalardy ázirleý týraly ýaǵdalasty.