Elimizde eńbekshilerge tólenbegen jalpy qaryzdyń somasy 90 mlrd. teńgege jýyqtap qalǵan - L. Martynov
ASTANA. Mamyrdyń 26-sy. QazAqparat /Ernur Aqanbaı/ - Elimizde eńbekshilerdiń atqarǵan jumystaryna tólenbegen jalpy qaryzdyń somasy 90 mlrd. teńgege jýyqtap qalǵan. Bul týraly búgin Astanada ótken QR Prezıdenti janyndaǵy Adam quqyqtary jónindegi komıssııanyń otyrysynda atalmysh komıssııanyń múshesi Leonıd Martynov málim etti,
dep habarlaıdy QazAqparat.
Onyń aıtýynsha, eńbek qatynastary salasynda, halyqtyń tabystaryn ádiletti bólip berýde, Eńbek kodeksin saqtaýda áli kúnge deıin problemalar oryn alyp otyr. «Kásipodaqtardy ásirese eńbekshilerge atqarǵan jumystary úshin aılyq jalaqynyń tólenbeı jatqany, ıaǵnı eńbekshiler quqyqtarynyń qatań túrde buzylyp jatqany alańdatýda. Eńbekshilerdiń zańdy quqyqtaryn buzý jónindegi bundaı faktiler respýblıkamyzda jyldar boıy jalǵasyp keledi. Prokýratýra óndirip alý jóninde sharalar qoldanyp jatqanymen, jyl saıyn qaryz somasy ulǵaıyp keledi. Qazirgi tańda eńbekke aqy tóleý boıynsha jalpy qaryz 90 mlrd. teńgege jýyqtap qalǵan», deıdi L. Martynov.
Onyń pikirinshe, jalpy mundaıǵa tap bolatyndaı elimizde eshqandaı da tótenshe jaǵdaı nemese áskerı jaǵdaı joq. Sondyqtan da, eńbekshilerdiń eńbek aqylaryn tólemeı jatqandardy Úkimetke shaqyryp, olarǵa qaryzdy eseptesý týraly úzildi-kesildi talap qoıatyn ýaqyt jetti. «Al, tóleı almaıtyndarǵa nemese tólegisi kelmeıtinderge qylmystyq qýdalaý sharalaryn qoldaný qajet. Eńbekshilerdiń mańdaı terimen tapqan eńbekaqylaryn ótetýdiń budan basqa amaly joq sııaqty», deıdi ol.
L. Martynovtyń sózine qaraǵanda, Kásipodaqtar federatsııasy jumysshylardy zańsyz jumystan shyǵarý úrdisi jalǵasyp jatqanyn, elimizdiń ekonomıkalyq turǵydan belsendi halqynyń úshten birin quraıtyn ózin-ózi jumyspen qamtyǵan halyqtyń problemalary áli sheshilmeginin, azamattardy jumysqa alý kezinde jasyna baılanysty kemsitýshilik faktileri bolyp turatynyn aıtyp, alańdaýda. «Eń baı jáne eń kedeı adamdardyń tabystary arasyndaǵy aıyrmashylyqtar ulǵaıyp barady. Kásipodaqtardyń pikirinshe, bıýdjet jáne aýylsharýashylyǵy salasynyń qyzmetkerleri respýblıkamyzda eń tómengi jalaqy alady, bul ádiletti emes. Olardyń jalaqysy ındeksatsııalanbaıdy. Kúnkórim mınımýmynyń jáne eń tómengi aılyq jalaqynyń shegin anyqtaý ádistemesin qaıta qaraý qajet. Qazirgi tańdaǵy qoldanystaǵy parametrler zamanǵa saı emes, olar eńbek qunyna sáıkes kelmeıdi jáne jumys kúshiniń udaıy óndirisiniń shyǵynyn jappaıdy», deıdi L. Martynov.
