Elimizde eńbekke jaramdy sottalýshylardyń 60 paıyzy ǵana jumys isteıdi

NUR-SULTAN. QazAqparat – Túrmede jazasyn ótep jatqan 11 699 azamat jumysqa ornalastyryldy, dep habarlaıdy QazAqparat Qylmystyq atqarý júıesi komıtetine silteme jasap.

«Qazir elimizdiń qylmystyq-atqarý júıesi mekemelerinde 28 myńǵa jýyq adam óz jazasyn ótep jatyr. Onyń 26 myńy jábirlenýshilerge jalpy somasy 1,2 mlrd teńgeden astam tólem óteýge mindetti», - delingen habarlamada.

Komıtettiń málimetinshe, sottalǵan azamattarǵa jazasyn óteı júrip, tabys tabýǵa múmkindik beriledi.

«Qazir qylmystyq atqarý júıesi mekemelerinde 11 699 adam jumysqa ornalasqan. Bul kórsetkish eńbekke jaramdy sottalǵandardyń jalpy sanynyń 60,2 paıyzyn quraıdy. Onyń ishinde kásiporyndarda - 4 myńǵa jýyq, sharýashylyq qyzmette - 3 myńǵa jýyq sottalýshy jumys isteıdi. Sonymen qatar jaýapkershiligi shekteýli seriktestikter men jeke kásipkerlikterde 5 myń adam eńbek etip jatyr», - deıdi vedomstvodan.