Elimizde eńbekke qabiletti 55 myńǵa jýyq adam áleýmettik járdemaqyǵa arqa súıep, jumys istegileri kelmeıdi - S.Jaqypova
ASTANA. QazAqparat - Elimizde eńbek etýge qabiletti 55 myńǵa jýyq adam ataýly áleýmettik járdemaqyǵa maldanyp, jumys istegileri kelmeıdi. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR Densaýlyq saqtaý jáne áleýmettik damý vıtse-mınıstri Svetlana Jaqypova aıtty.
«Jalpy, ataýly áleýmettik járdemaqy azamattyń tabysy azyq-túlik sebeti men kúnkóris qajettiligi kórsetkishiniń 40 paıyzynan kem bolǵan jaǵdaıda ǵana beriletindigi belgili. Alaıda áleýmettik járdemaqy alatyn azamattardyń ishinde 55 myńǵa jýyq adam memleket tarapynan usynylǵan túrli baǵdarlamalar aıasynda jumys isteýge qulyq tanytar emes. Óıtkeni, olardyń jasyryn ári zańsyz az da bolsa tabystary bar ekendigi belgili», - dedi ol.
Sondyqtan da onyń aıtýynsha, Úkimet dál osy baǵyttaǵy jumystardy qolǵa alyp otyr. Alǵashqy nátıjeler de bar.
«Máselen, biz «Jol kartasy-2020» baǵdarlamasy aıasynda múgedek bolsa da, eńbek etýge qabiletti 12 myńǵa jýyq adamdy jumysqa tarttyq», - degen S.Jaqypova 3,7 myń múgedek túrli qoǵamdyq jumystarǵa belsendi qatysyp, 761 adam áleýmettik jumystarǵa ornalastyrylǵandyǵyn atap ótti.
