Elimizde «Eń úzdik jeke ınvestor» baıqaýy bastaldy
ALMATY. Qyrkúıektiń 13-i. QazAqparat /Ádilet Musahaev/ - Elimizde qor naryǵyna qatysýshy jeke tulǵalar arasynda tuńǵysh ret «Eń úzdik jeke ınvestor» baıqaýy uıymdastyrylyp otyr. Bul jaıynda búgin arnaıy ótken baspasóz máslıhatynda aıtyldy,
dep habarlaıdy QazAqparat.
Atalmysh jobany Almaty qalasy óńirlik qarjy ortalyǵy (AÓQO) Akademııasy negizinde qurylǵan Jeke ınvestorlar klýby men birqatar brokerlik kompanııalar uıymdastyrýda.
Uıymdastyrýshylardyń aıtýynsha, 15-shi qyrkúıekten jeltoqsannyń 15-ne deıin jalǵasatyn sharaǵa kámelettik jasqa tolǵan, brokerlik shotqa ıe tulǵalar qatysa alady.
"Baıqaýdy ótkizýdegi basty maqsat - Qazaqstan qor naryǵyndaǵy jeke tulǵalardyń ınvestıtsııalyq úlesiniń artýyna, ınvestorlardyń osy sala boıynsha óz biliktilikteri men sheberlikterin kórsetýine múmkindik berý jáne qazaqstandyq emıtetterdiń baǵaly qaǵazdarǵa degen suranysyn arttyrýǵa jol ashý", deıdi AÓQO-nyń Basqarma tóraǵasynyń orynbasary Erlan Jazyqbaev.
Sonymen qatar E.Jazyqbaev, baıqaý aıasynda qatysýshylar ashyq saýda tásilimen saýda bırjasy rejıminde baǵaly qaǵazdardy satý-satyp alý kelisimderin júzege asyratyndyǵyn aıtady. "Qatysýshy kelisimge qol qoıatyn qundy qaǵazdar tizimine Qazaqstan qor bırjasynda aınalymda júrgen barlyq baǵaly qaǵazdar enedi. Eń úzdik ondyqtyń aralyq tizimi qalyptastyrylyp, ony baıqaýdyń ınternet-resýrstary jáne aqparattyq seriktestikter arqyly jarııalaý josparlanyp otyr", dep atap ótti E.Jazyqbaev.
Jeke ınvestorlar klýbynyń basshysy Serik Omar bul baıqaýdyń qazaqstandyq jeke ınvestorlar arasynda úlken qyzyǵýshylqqa ıe bolatynyn aıtady. "Búgingi kúni ınvestorlardyń sany 10 myńǵa jýyqtap otyr. Osylaısha, olar tabys tabýdy, ıaǵnı unaıtyn jáne paıdaly isti qatar qoldana alady. Qor naryǵynda qyzmet etetin jeke oıynshylarmen qatar, biz teorııamen tanys, biraqta ózin is júzinde synap kórmegen tulǵalardy baıqaýǵa qatysýǵa tartpaq nıettemiz", deıdi S.Omar.
Atalmysh baıqaýǵa CAIFC, Centras Securities, Halyk Finance, Seven Rivers Capital, Premier Capital sııaqty brokerlik kompanııalar qatysady.
Jeńimpaz 500 myń teńgege qol jetkizip, jaqsy nátıje kórsetken basqa qatysýshylar shara demeýshileriniń atynan baǵaly syılyqtarmen marapattalady.
