Elimizde eń kóp satylatyn 10 kóliktiń toǵyzy Qazaqstanda óndiriledi
NUR-SULTAN. QazAqparat – Qazaqstan avtobıznes qaýymdastyǵy elimizde tamyz aıynda qansha kólik satylǵany týraly aıtty, dep habarlaıdy QazAqparat.
Otandyq dıllerler tamyz aıynda 5 781 jeńil kólik pen jeńil kommertsııalyq tehnıkany, sondaı-aq 607 júk kóligi men arnaıy tehnıkany, avtobýstardy satqan. Qazaqstandyqtar tamyzda kólik satyp alý úshin 60 mlrd teńge jumsaǵan.
«Tamyz aıynda kóshbasshylar tizimin Lada – 1 377 avtomobıl bastady (ótken aıǵa qaraǵanda -3%). Ekinshi oryn Hyundai markasynda bolsa (1 269 birlik; -8%), úshinshi oryn Toyota (1 254 avto (-12%)) markasynda. Qostanaı óndirisiniń Ravon avtomobılderi tórtinshi (323 birlik; -1%) orynǵa turaqtap, nyǵaıýyn jalǵastyrýda. Birden úsh brend Renault (238 birlik; -2%), Nissan (191 birlik; -1%) jáne Volkswagen (176 birlik; +87%) Kia (162) markasyn tómenge oryndarǵa ysyryp jiberdi. Úzdik ondyqqa Lexus premıým segmenti (139 birlik) jáne Skoda avtokólikteri (93 birlik; -45%) túıindedi», - dep habarlaıdy qaýymdastyqtan.
Modelderdi esepke alǵanda birinshi oryndy Toyota Camry 70 ustap tur. Ótken aıda atalmysh markamen 578 kólik satylǵan. Ekinshi oryn Lada Granta – 453 avto. Odan keıingi oryndardy Lada Vesta (381), Hyundai Tucson (373), Ravon Nexia R3 (317 birlik), Hyundai Creta (299 birlik), Hyundai Elantra (264 birlik), Lada 4x4 (252 birlik), Hyundai Accent (243 birlik) jáne Lada Largus (211 birlik) jalǵastyryp kete beredi.
Qazaqstanda eń kóp satylatyn 10 kóliktiń toǵyzy otandyq kásiporyndarda óndiriledi.
