Elimizde eń kemi 29 «qamaý úıleri» salynýy kerek - ІІM
ASTANA. QazAqparat - Jańa qylmystyq atqarý normalarynyń engizilýine baılanysty elimizde eń kemi 29 «qamaý úılerin» salý kerek. Búgin Májiliste qylmystyq-atqarý júıesindegi máselelerge arnalǵan Úkimet saǵatynda QR Іshki ister mınıstri Qalmuhanbet Qasymov osylaı málim etti.
«Qylmystyq atqarý zańnamasynyń qoldanysqa enýine oraı, birqatar problemalardy sheshý talap etiledi. Atap aıtqanda, «qamaý úılerin» salý máselesi ózekti, óıtkeni jańa Qylmystyq Kodekste qylmystyq teris qylyq kórsetilgen 150 bap boıynsha otyz kúnnen toqsan kúnge deıin qamaý jazalary qarastyrylady. Mundaı qylmysqa tartylǵandardyń barlyǵy arnaıy «qamaý úılerinde» ustalýy tıis. Alaıda jazanyń bul túrin tájirıbege engizý birqatar problemalardy týdyrady. Máselen, sarapshylardyń esebi boıynsha jyl saıyn osy bapqa jatatyn qylmyspen qamalatyndar sany 17-18 myń adamdy qamtýy múmkin. Sondyqtan da elimizde eń az degeni 29 «qamaý úılerin» salý kerek», - dedi mınıstr.
Onyń aıtýynsha, «qamaý úılerinde» uzaq ýaqyt ustaý boıynsha ınfraqurylymdar tolyq qamtylyp, tutqyndar úshin serýendeıtin aýlalar, kezdesý oryndary bolýy shart. Sonymen qatar jańa kodekstegi «qamaýǵa alý» normasy 2017 jyldan bastap qoldanysqa enbek. «Al qazir mınıstrlik tek úsh «qamaý úılerin» salýǵa qatysty jobalyq-smetalyq qujattarǵa shyǵystardy qarastyryp otyr. Olar Astana, Almaty jáne Shymkent qalalarynda. Olardyń qurylysy aıaqtalǵansha biz qylmysqa tartylǵandardy onsyz da adamdarǵa lyq toly bolyp turǵan arnaıy ustaý oryndaryna qamaýǵa májbúr bolamyz», - dedi ІІM basshysy.
Bul rette vedomstvo basshysy ondaı qamaý oryndarynyń barlyǵynyń jaǵdaıy tym nashar ekenin, olardyń eshqaısysy uzaq ýaqyttyq ustaýlar úshin qarastyrylmaǵanyn jetkizdi. Mınıstrdiń sózine qaraǵanda, ondaı oryndardyń basym bóligi jertólelerde ornalasqan, ári jaı-kúıleri de normatıvterge saı kelmeıdi.
