Elimizde elektrondy saýda qarqyndy damyp keledi

ASTANA. QazAqparat – Elimizde elektrondy kommertsııa pandemııa kezindegideı qarqyndy bolmasa da ósip kele jatyr, dep habarlaıdy QazAqparat tilshisi.

Finprom.kz portalynyń Euromonitor International halyqaralyq naryqty zertteý kompanııasynyń aldyn ala málimetterine súıenip jazýynsha, Qazaqstandaǵy elektrondy saýda kólemi byltyr 20,2 paıyzǵa (ınternet arqyly qyzmet kórsetý saýdasyn qospaǵanda) ósip, 1,3 trln teńgege jetti. Bul bir jyl burynǵydan 220,1 mlrd teńgege artyq.

Úlken ónim toptaryn qarastyrǵan kezde, sanattardyń birde-bireýi teris dınamıka kórsetpegeni baıqalady. Qazaqstandyqtar ınternet arqyly kóbirek satyp alýda. Byltyr onlaın saýdanyń jalpy kólemindegi aıtarlyqtaı úlesti (32,4%) sán segmenti ıelendi. Sońǵy bir jylda qazaqstandyqtar ınternette kıim, aıaq kıim jáne túrli aksessýarlardy satyp alýǵa 423,9 mlrd teńge (17% kóbeıgen) jumsaǵan. Ekinshi orynda turmystyq tehnıka men elektronıka tur. Bul sanattyń úlesi 27,1 paıyzdy qurady. Joǵary tehnologııalyq taýarlar 11,6 paıyz ósimmen 355 mlrd teńgege jetti.

Azyq-túlik segmenti de onlaın saýdaǵa oıysyp jatyr. Elektrondy azyq-túlik naryǵynyń kólemi shamamen úshten birge ósti: 35,4 mlrd teńgeden 45,5 mlrd teńgege deıin. Sondaı-aq sýsyndar men temeki ınternet arqyly áldeqaıda úlken kólemde satyla bastady: 69,9 mlrd teńge, bir jylda 23,3 paıyz kóbeıgen.