Elimizde eksporttyq baqylaýdyń ulttyq júıesi jetildiriledi

NUR-SULTAN. QazAqparat – Qazaqstan eksporttyq baqylaýdyń ulttyq júıesin jetildiredi, dep habarlaıdy QazAqparat QR IIDM baspasóz qyzmetine silteme jasap.

Qazirgi ýaqytta mınıstrlik eksporttyq baqylaýdyń qazirgi zamanǵa saı jáne tıimdi júıesin qurý maqsatynda «Erekshe taýarlardy baqylaý týraly» (QR «Eksporttyq baqylaý týraly» zańy jańa redaktsııada) jáne «Erekshe taýarlardy baqylaý máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» (ilespe zań jobasy) zań jobalaryn ázirlep jatyr.

Bul zań jobalary jappaı qyryp-joıý qarýyn taratpaýǵa qatysty Qazaqstan Respýblıkasynyń halyqaralyq mindettemelerin saqtaýǵa baǵyttalǵan (BUU Qaýipsizdik keńesiniń 1540 qarary) qarý-jaraq pen áskerı tehnıkany zańsyz satýǵa jol bermeýdi kózdeıdi (qarý-jaraq saýdasy týraly shart).

«Qazirgi kezde zań jobalarynyń tujyrymdamalary Qazaqstan Respýblıkasy Úkimeti janyndaǵy zań jobalaý qyzmeti máseleleri jónindegi vedomstvoaralyq komıssııanyń 499-otyrysynda maquldandy», delingen habarlamada.

Aıta ketý kerek, qoldanystaǵy «Eksporttyq baqylaý týraly» zań 2007 jyly qabyldanǵan. 10 jyldan astam buryn qurylǵan qosarly jáne áskerı maqsattaǵy taýarlardy baqylaý júıesiniń qalyptasqan uıymdyq qurylymy men halyqaralyq standarttarǵa jaýap beretin tolyqqandy zańnamasy bar.

«Tez ózgerip jatatyn halyqaralyq ahýal jaǵdaıynda qosarly jáne áskerı maqsattaǵy taýarlardy baqylaýdyń ulttyq júıesi Normatıvtik-quqyqtyq bazany turaqty damytýdy jáne jetildirýdi talap etedi.

Qazirgi ýaqytta zań jobalary Qazaqstan Respýblıkasynyń múddeli memlekettik organdaryna kelisim jumystaryn júrgizý úshin joldandy», delingen habarlamada.