Elimizde ekinshi deńgeıli bankterdegi merzimi ótken bereshekter 1 trln 224 mlrd teńgeni quraıdy
ASTANA. QazAqparat - Elimizde ekinshi deńgeıli bankterdegi merzimi ótken bereshekter 1 trln 224 mlrd teńgeni quraıdy. Bul týraly búgin Májiliste «Kollektorlyq qyzmet týraly» zań jobasynyń tanystyrylymy barysynda málim boldy.
QR Ulttyq bankiniń usynǵan málimetterine qaraǵanda, qazirgi tańda elimizdegi ekinshi deńgeıli bankterden kredıt alǵan jeke tulǵalardyń sany 5 mln. 154 myń 200 adamdy quraıdy. Onyń ishinde 1 mln. 102 myń 905 adamnyń boryshkerlik merzimi 90 kúnnen asyp ketken. Al merzimi ótken bereshekter kólemi 1 trln. 224 mlrd teńgeni qurap otyr.
Budan bólek, mıkroqarjy uıymdarynan kredıt alǵan azamattardyń sany 209 myń 807 adamdy quraıdy. Onyń ishinde 5 myń 228-iniń tóleý merzimi 90 kúnnen asqan. Al merzimi ótken bereshekter somasy 1,3 mlrd teńgege jetip otyr.
2016 jyldyń 1 qańtardaǵy jaǵdaı boıynsha bankter kollektorlyq agenttikterge bergen merzimi ótken kredıtter boıynsha bereshekter somasy 324,5 mln. teńgeni quraǵan. Ondaǵy boryshkerler sany 837 myń 365 adam.
