Elimizde eki aptada 328 atys qarýy tárkilendi

NUR-SULTAN. QazAqparat – Іshki ister mınıstrliginiń ókilderi «Qarý» jedel aldyn alý sharasynyń aıasynda 328 atys qarýyn tárkiledi, dep habarlaıdy QazAqparat.

17 mamyrdan bastap respýblıkalyq aýqymda qolǵa alynǵan sharanyń maqsaty – qarýmen jasalatyn qylmystardyń aldyn alý, zańsyz aınalymnan qarý men oq-dárilerdi anyqtaý jáne tárkileý, azamattyq jáne qyzmettik qarý aınalymyn baqylaý.

«Jedel aldyn alý is-sharasy kezinde polıtsııa organdary zańsyz aınalymnan 328-den astam atys qarýyn tárkiledi. Onyń ishinde 212 dana tegis uńǵyly qarý, 38 dana gazdy qarý, 9 qoldan jasalǵan qarý, 27 travmatıkalyq qarý, 18 elektrlik qarý alyndy. Qarýdy zańsyz saqtaǵany jáne alyp júrgeni úshin QR QK 287-baby boıynsha 134 materıal tirkeldi», - dedi Nurdildá Oraz.

Mınıstrdiń keńesshisi qarýdy zańsyz saqtaǵany jáne alyp júrgeni úshin 195 azamat Ákimshilik quqyq buzý kodeksiniń 482-baby boıynsha ákimshilik jaýapkershilikke tartylǵanyn da aıtty.

«Budan basqa, 994 zańdy tulǵa tekserildi. Onyń ishinde qarý-jaraq saýdasyna mamandanǵan 72 dúken, 9782 fermerlik jáne sharýa qojalyq jáne 84490 azamattyq qarý ıeleri tekserildi. Tekserý nátıjesinde 3196 tártip buzý faktisi anyqtaldy. Onyń 2404-i qarýdy saqtaý jáne alyp júrý erejelerin buzsa, 792-si qarýdy tirkeý jáne qaıta tirkeý tártibin buzǵany úshin jaýapkershilikke tartyldy», - dedi mınıstrlik ókili.