Elimizde eginniń 17,6 paıyzy oryldy

NUR-SULTAN. QazAqparat – Elimiz boıynsha 26 tamyzǵa deıin 3 mln 363,5 myń tonna astyq bastyrylǵan, dep habarlaıdy QazAqparat.

QR Aýyl sharýashylyǵy mınıstrliginiń aqparaty boıynsha, esepti kezeńde dıqandar 2 mln 685 myń ga, alqapty orǵan nemese barlyq óńirlerge tıesili egistiktiń 17,6 paıyzyna oraq túsken. Ortasha ónimdilik ár gektarǵa 12,5 tsentnerden keledi.

«2018 jyldyń atalǵan kezeńinde 1 mln 323,5 myń ga alqap orylǵan bolatyn. Ol kezde ortasha ónimdilik gektaryna15,5 tsentnerdi quraǵan», - delingen mınıstrliktiń málimetinde.

Bıyl dıqandar jalpy aýmaǵy 15 mln 214 myń gektar bolatyn alqaptan astyq jınap úlgerýi kerek. 2018 jyly egis kólemi 15 mln 8,1 myń gektar bolǵan.

Estke salsaq, 2018 jylǵy jıyn-terin naýqanynyń qorytyndysy boıynsha 22 mln 810 myń tonna astyq bastyrylyp, ortasha ónimdilik gektaryna 15,1 tsentnerdi quraǵan.