Elimizde dombyra pishinindegi alǵashqy fontan iske qosylady

ALMATY. QazAqparat - Almatyda Qurmanǵazy atyndaǵy Qazaq ulttyq konservatorııasynyń aýmaǵynda dombyra pishinindegi sýburqaq paıda boldy. Bul týraly QR Mádenıet jáne sport mınıstrliginen málim etti, dep habarlaıdy QazAqparat.

«Fontannyń dombyra pishinde bolýy beker emes. Sebebi dombyra qazaqtyń mýzykalyq mádenıetindegi shoqtyǵy bıik aspap bolyp tabylady. Yqylym zamandardan osy kúnge deıin halyqpen birge jasasyp kele jatqan, dástúrli repertýary eń baı aspap. Qazaq dombyramen qýanyshyn da, qaıǵysyn da bólisip, tarıh-shejiresin baıandap, kóńil-kúı men ishki jan tebirenisin jetkizgen. Dombyra qazaq halqynyń ulttyq brendi bolyp sanalady. «Rýhanı jańǵyrý» baǵdarlamasy aıasynda atqarylǵan jobalar boıynsha bul aspap ulttyq qundylyqtarymyzdy dáripteýdiń eń úlken quralyna aınalyp, álemge qazaq ónerin tanytýda úlken ról atqaryp keledi», - dep atap ótti mınıstrliktiń baspasóz qyzmetinen.

Dombyra pishinindegi sýburqaq konservatorııanyń úlken kontsert zaly aldyndaǵy alańqaıda, Qurmanǵazy eskertkishi janynda salyndy. Joba avtorlarynyń oıynsha art-nysan uly kúıshiniń atyn ıelengen elimizdegi eń kóne oqý oryndarynyń biri sanalatyn óner ordasyna kórik bermek.

Fontannyń uzyndyǵy - 10,25 metr, eni - 2,85 metr. Joǵary qysymmen jumys isteıtin zamanaýı sorǵylarmen jabdyqtalǵan. Dombyrany 40-qa jýyq sham jaryqtandyryp turady. Týyndynyń avtorlary - N.A.Qanybekov jáne N.N.Qýanyshbekov.

Jańa nysan Fontandar kúni, ıaǵnı 25 mamyrda iske qosylatyn bolady.

Eske salaıyq, QR Tuńǵysh Prezıdenti Nursultan Nazarbaevtyń 2018 jyldyń 13 maýsymyndaǵy qaýlysymen Ulttyq dombyra kúni bekitilgen bolatyn. Mereke shilde aıynyń birinshi jeksenbisinde atap ótiledi. Budan bólek, dombyrada qazaqtyń dástúrli kúılerin oryndaý óneri ıÝNESKO-nyń Materıaldyq emes mádenı muralary tizimine engenin atap óteıik.