Elimizde dızel otyny qymbattaıdy
ASTANA. QazAqparat - Osy aıdan bastap elimizde dızel otyny qymbattaıdy, dep jazady KTK. Janarmaıdyń naqty qansha teńge bolatyny ázirge belgisiz. Degenmen kemi 10-15 paıyz degen boljam bar. Al baǵany kóterýge monopolııaǵa qarsy agenttik ruqsatyn berip qoıǵan.
Dızel otynyna baǵanyń turaqsyzdyǵy ásirese sharýalardyń qaltasyn qaqqaly tur. Óıtkeni, birer aptada egin egý naýqany bastalǵaly jatyr. Jalpy kóktem men kúzde dál osy solıarka baǵasynyń qubylýy qashannan ádetke aınalǵan. Onyń ústine bıyl týra naýqan aldynda sol qymbattaǵaly jatqan dızeldiń tapshylyǵy aıtylýda. Jetispeýshilik tipti keı aımaqtarda sezile bastaǵan. Іshki suranysty qamtýǵa otandyq zaýyttardyń shamasy jetpeı jatqanǵa uqsaıdy.
«Bizdiń agenttikte dızel otynynyń baǵasyn esepteıtin jańa formýla maquldandy. Sondyqtan mamyrdan bastap, tek dızel baǵasy qymbattaıdy. Baǵanyń qanshalyqty kóteriletinin naqty aıta almaımyn. Sheshim taıaý kúnderi shyǵady», - deıdi QR Tabıǵı monopolııalardy retteý agenttigi tóraǵasynyń orynbasary Asylbek Dúısebaev.
