Elimizde densaýlyqqa qasaqana zııan keltirý qylmystarynyń ashylýy 95 paıyzǵa tómendegen
Finprom.kz portalynynyń málimetinshe, densaýlyqqa qasaqana aýyr zııan keltirý boıynsha qylmystyq quqyq buzýshylyqtardyń ashylýy 95 paıyzǵaǵa deıin tómendegen. Al densaýlyqqa qasaqana aýyr zııan keltirýdiń tirkelgen jaǵdaılary 3 paıyzǵa artyp otyr.
Osy jyldyń qańtar-shilde aılarynda elimizde «Densaýlyqqa qasaqana aýyr zııan keltirý» baby boıynsha 1,12 myń qylmystyq quqyq buzýshylyq tirkeldi. Bul bir jyl burynǵy derekten 2,8 paıyzǵa artyq. Onyń ishinde 219 quqyq buzýshylyq (byltyrǵydan 14,1 paıyzǵa kóp) adam ólimine ákep soqtyrǵan.
Óńirler boıynsha bıyl «Densaýlyqqa qasaqana aýyr zııan keltirý» babymen eń kóp quqyqbuzýshylyq Shyǵys Qazaqstan oblysynda tirkeldi: 127 oqıǵa, byltyrǵydan 25,7 paıyz az. Odan keıin Almaty qalasy (105 jaǵdaı, +9,4%), Almaty jáne Qaraǵandy oblystary (árqaısysynda 101 jaǵdaı) tur. Mundaı quqyq buzýshylyqtardyń eń azy Abaı oblysynda tirkelgen: tek 1 jaǵdaı ǵana.
Al densaýlyqqa qasaqana aýyr zııan keltirý boıynsha qylmystyq quqyq buzýshylyqtardyń ashylý deńgeıi 2022 jylǵy qańtar–shildede 94,8 paıyz boldy, byltyr osy ýaqyt aralyǵynda 97,8 paıyz bolǵan edi. Qazaqstanda mundaı qylmystardyń ashylý deńgeıi Mańǵystaý oblysynda eń joǵary – 100 paıyz. Odan keıingi orynda Shyǵys Qazaqstan oblysy men elorda tur: tıisinshe 99,1 jáne 98,7 paıyz. Almaty qalasynda mundaı qylmystardyń ashylý kórsetkishi tómen - 78,6 paıyz. Al elimizdiń jańadan qurylǵan úsh oblysynda birde-bir is ashylmaǵan.