Elimizde daýlardy medıatsııa tártibimen retteý baǵytynda pılottyq joba júzege asyrylmaq
ORAL. QazAqparat - Elimizde daýlardy medıatsııa tártibimen retteý baǵytynda pılottyq joba júzege asyrylmaq. Bul týraly Dostyq úıinde «Daýlardyń jekelegen sanattary boıynsha daýlardy (janjaldardy) medıatsııa tártibimen sotqa deıingi retteýdi engizý boıynsha pılottyq jobany iske asyrý» taqyrybynda ótkizilgen dóńgelek ústel otyrysynda aıtyldy, dep habarlaıdy «QazAqparat» HAA tilshisi.
Atalmysh joba Joǵarǵy sot tóraǵasy Qaırat Mámıdiń bıylǵy 26 qańtardaǵy ókimimen bekitilip, júzege asyrý merzimi aqpan-shilde aılary bolyp belgilengen bolatyn.
Otyrysta oblys ákimi Altaı Kólginovtiń atap ótkenindeı, medıatsııa ınstıtýtynyń qurylǵanyna bıyl alty jyl toldy. Shet elderde keńinen qoldanylatyn medıatsııany damytý baǵytynda 2016 jyly Qazaqstanda memorandýmǵa qol qoıylǵan edi. Bul baǵytta BQO ákimdigi men oblystyq sot arasynda da kelisim jasalyp, naqty is-sharalar júzege asyrylýda. Mysaly, óńirde ótken jyly 145 medıatsııa kabıneti ashylyp, qazirgi tańda 200-ge jýyq kásibı jáne qyryq shaqty kásibı emes medıatorlar jumys jasaýda. 1700-den astam azamattyq is medıatorlardyń aralasýymen sheshilgen. Oǵan qosa ortasha aýyr dárejedegi qylmystyq isterdiń 44 paıyzy kelissóz nátıjesinde qysqartylǵan. Degenmen turǵyndar arasynda júrgizilgen saýalnama olardyń medıatorlardyń qyzmetin jete bilmeıtinin kórsetti. Sondyqtan aqparattyq-túsindirý jumystaryn keńinen júrgizý qajet-aq.
BQO sotynyń tóraǵasy Bek Ámetov medıatsııanyń múddeli emes taraptardyń qatysýymen daýlardy retteýdiń beıtarap, ádil túri ekendigin, onyń qazaq tarıhyndaǵy bıler sotyna uqsastyǵyn aıtyp, pılottyq jobany júzege asyrýdyń mańyzy zor ekendigin jetkizdi. Eń bastysy, ol qoǵamdaǵy daý, janjaldardyń mámile jolymen rettelip, barynsha azaıýyna septesedi.
