Elimizde dárigerlerge ústemaqy tóleýge qatysty daý bar dep aıta almaımyn - Baǵdat Qojahmetov

NUR-SULTAN. QazAqparat - QR Densaýlyq saqtaý mınıstrliginiń resmı ókili Baǵdat Qojahmetov medıtsına qyzmetkerlerine ótemaqy men ústemaqy tóleý máselelerine qatysty týyndaǵan suraqtarǵa jaýap berdi, dep habarlaıdy QazAqparat tilshisi.

Ortalyq kommýnıkatsııalar qyzmetindegi baspasóz máslıhaty barysynda BAQ ókilderi Baǵdat Qojahmetovke: «Osy ýaqytqa deıin qosymsha ótemaqy alyp kelgen sol jaǵalaýdaǵy jedel járdem qyzmeti operatorlarynyń aqshasyn osy aıdan bastap tólemeı qoıǵan. Oǵan ne sebep?», - dep saýal qoıǵan bolatyn.

«Ondaı faktiler bolsa bizge mindetti túrde «mynandaı óńirde, mynadaı mekemede medıtsına salasynyń qyzmetkerlerine ótemaqy tólemeı jatyr« dep naqty habarlańyzdar. Negizi medıtsına salasynyń kez kelgen qyzmetkeri koronavırýsqa shaldyqsa ótemaqy alý úshin jergilikti komıssııaǵa ótinish berýi kerek. Komıssııa qarastyryp sheshim qabyldaıdy. Eger komıssııa sheshimimen óteaqy tólemeý týraly sheshim bolsa, onda dáleldeýge tyrysý kerek. Jalpy, sheshim qabyldanbasa, onda onyń sebebi bar degen sóz», - dep jaýap berdi resmı ókil.

Sonymen qatar ol medıtsınalyq qyzmetkerlerge ústemaqy barlyǵyna birdeı emes, tek provızorlyq ortalyqtar men juqpaly aýrýlar aýrýhanasynda jumys istegen, indetpen kúreste aldyńǵy qatarda júrgen mamandarǵa tólenetindigin aıtty.

«Árıne, adambyz ǵoı. Adam bolǵannan keıin mundaı jaıttar bolýy múmkin. Jalpy elimizde ústemaqy tóleýge qatysty daý bolyp jatyr deýge aýzym barmaıdy. Biraq, barlyq múmkindikti paıdalanyp, komıssııanyń aralasýymen júıeli jumys júrgiziledi. Eger medıtsına salasynyń mamany tıisti sanatqa saı keletin bolsa, onda oǵan mindetti túrde ústemaqy tólenedi», - dedi Baǵdat Qojahmetov.