Elimizde dári-dármek qory jetkilikti - Nurlybek Asylbekov
«Elimizdiń medıtsınalyq uıymdaryn dári-dármekpen úzdiksiz qamtamasyz etý máselesi Úkimettiń erekshe baqylaýynda. Ózderińiz biletindeı, koronavırýs ınfektsııasyn juqtyrǵandar sanynyń ósýine baılanysty maýsym aıynyń sońy men shilde aıynyń basynda elimizdiń aýrýhanalary men provızorlyq ortalyqtarynda dári-dármek tapshylyǵy boldy. Bul tapshylyq bólshek saýda jelisinde kórinis tapty. Osy maqsatta naryqty dárilik zattarmen tolyqtyrý úshin QR Úkimeti basqa elderden 10 mln-nan astam qaptama kóleminde ushaq borttarymen dárilik zattardyń 50-den astam ataýyn jetkizýdi uıymdastyrdy. Bul dári-dármekter aımaqtar arasynda birkelki bólindi», - dedi N. Asylbekov Ortalyq kommýnıkatsııalar qyzmetinde.
Osy oraıda ol naryqqa ákelýdi ári qoljetimdikti ońaılatý úshin mınıstrlik ruqsat berý qujattaryn 1 táýlikke deıin berý rásimderin jeńildetkenin eske saldy.
«Sonymen qatar, koronavırýstyń yqtımal ekinshi tolqyny jaǵdaıynda óńirlerde suranysqa ıe dárilik preparattardy satyp alý úshin kóterme dıstrıbıýtorlarǵa qaıtarymdy negizde qarajat bólý turǵysynda turaqtandyrý qorlary uıymdastyryldy. Budan basqa, Farmatsevtıkalyq baqylaý komıteti óńirlerdegi kóterme dıstrıbıýtorlarda, bólshek saýdada neǵurlym suranysqa ıe dárilik zattardyń, medıtsınalyq zattardyń bolýyna monıtorıngti turaqty negizde júrgizip otyr», - dedi komıtet ókili.
Osy oraıda monıtorıng nátıjelerin taldaý barysy bıylǵy 15 shildeden 9 qarashaǵa deıin kóterme saýda qoımalary men dárihanalarda antıbıotıkter 3,9 ese, vırýsqa qarsy preparattar 3,2 ese, antıkoagýlıanttar 32 eseden astam, maskalar 2,3 ese jáne basqa da dárilik zattar qorynyń ósýin kórsetti.
«Qazirgi kezde dárihanalarda halyqtyń dárilik zattarǵa qajettiligin qamtamasyz etý úshin preparattar jetkilikti», - dedi Asylbekov Nurlybek.