Elimizde dári-dármek baǵasy qalaı retteledi
Memleket basshysy ótken jyldyń 28 jeltoqsanynda «QR keıbir zańnamalyq aktilerine dárilik zattar men medıtsınalyq buıymdardyń aınalymy máseleleri boıynsha ózgerister men tolyqtyrýlar engizý» týraly zańǵa qol qoıdy.
«Atalǵan zań 3 aıdan soń kúshine enedi. Óıtkeni 3 aı boıy mınıstrlik dári-dármektiń baǵasyn retteý erejesin bekitedi. Onda kóterme jáne bólshektep satýdyń normasy men baǵa kórsetkishi naqty kórsetiletin bolady. Dári-dármek jetkizý jáne satýmen aınalysatyn uıymdar sol erejege saı jumys isteýi tıis. Bekitilgen ereje saqtalmaǵan jaǵdaıda, ıaǵnı dári baǵasy zańsyz kóterilgeni anyqtalsa, uıym ákimshilik jaýapkershilikke tartylady nemese lıtsenzııasynan aıyrylady»,- dedi QR DSM Farmatsııa komıtetiniń tóraıymy Lıýdmıla Bıýrabekova OKQ-de ótken baspasóz máslıhatynda.
Onyń aıtýynsha, dári-dermek baǵasy jylyna eki ret bekitiledi - qańtar jáne shilde aılarynda. Atalǵan ýaqyt aralyǵynda dári óndirýshiler men satýshylar óz ónimderin bekitilgen baǵamen tirkep satýǵa múmkindik beredi.
«Elimizde 8 myńnan astam dári túri tirkelgen, búginde onyń 2 myńnan astamynyń baǵasy rettelip bekitildi. Endigi ýaqytta Qazaqstan terrıtorııasynda tirkelgen barlyq dári-dármektiń baǵasy birkelki bolady. Dári baǵalary týraly aqparat mınıstrlik, Farmatsııa komıteti jáne barlyq oblystyq densaýlyq saqtaý basqarmalarynyń resmı saıttarynda jarııalanady», -dedi ol.
Odan bólek, L. Bıýrabekova búginde dári-dármek pen onyń baǵasyn tekserýge arnalǵan mobıldi qosymsha jasalyp jatqanyn aıtyp ótti.
«Qosymsha arqyly kez kelgen azamat dáriniń Qazaqstan terrıtorııasynda zańdy tirkelgeni jáne onyń baǵasynyń bekitilgen erejege saı ekendigin qadaǵalaı alady. Eger dárige qatysty tártip buzýshylyq anyqtalǵan jaǵdaıda, sol qosymsha arqyly shaǵymdaný múmkindigi qarastyrylǵan», -dedi komıtet basshysy.