Elimizde dárethanasy aýlada ornalasqan qansha mektep bar

NUR-SULTAN. QazAqparat - Elimizde dárethanasy aýlada ornalasqan 245 mektep qalyp otyr. Bul týraly QR Bilim jáne ǵylym mınıstrligi Bilim jáne ǵylym salasyndaǵy baqylaý komıtetiniń basshysy Gúlzat Kóbenova aıtty, dep habarlaıdy QazAqparat tilshisi.

«Búginde monıtorıngpen 6 971 mektep qamtyldy. Tek 245 mektep ǵana aýladaǵa dárethana qalyp otyr. Іs júzinde bir jyl buryn bul san 2 700-den astamdy mektepti quraǵan bolatyn. Osy arqyly óńirlerdegi jyly týalet ornatý dınamıkasyn baıqaımyz. Dárethana aýlada ornalasqan 245 mektepte jynysyna baılanysty bólý, aralyq qabyrǵa ornatý syndy problemalar bar. Degenmen, bul mektepter sheshim taýyp jatyr. Olardyń ishinde 195 bilim berý uıymy jyly dárethana ornatý jumystaryn júrgizý ústinde. Qalǵan 50 mektepke qatysty másele sheshilýde. Bul bilim ordalary Atyraý, Almaty, Shyǵys Qazaqstan, Jambyl, Batys Qazaqstan, Qaraǵandy, Túrkistan oblystarynda jáne Shymkent qalasynda ornalasqan», - dedi Gúlzat Kóbenova mınıstrliktiń apparat keńesi barysynda.

Onyń atap ótýinshe, dárethanalardy jynysqa baılanysty bólý, aralyq qabyrǵa jasaý máselelerine de monıtorıng júrgizilgen. 33 mektep dál osyndaı sáıkessizdikti joıýy tıis. 195 mektepte atalǵan problemany joıýǵa baǵyttalǵan jumys aıaqtalýǵa jaqyn. Olardyń barlyǵynda jyl sońyna deıin kemshilikterdi joıý jumystary atqarylady.

«Memleket basshysynyń tapsyrmasyna sáıkes, ótken jyldyń qarashasynan búginge deıin 2 700 mekteptiń ishinde 2 456 bilim berý uıymyna jyly dárethana ornatyldy. Jyly dárethanalar tolyqqandy jumys isteý úshin jynysyna qaraı bólý, aralyq qabyrǵa qarastyrý, sý berý máselesin sheshý qajettigine nazar aýdartqym keledi. Áli kúnge deıin 197 uıymda sý berý problema oryn alyp otyr. Sonymen qatar káriz júıesine qosý máselesin de sheshken jón»,- dedi ol.