Elimizde daǵdarys ortalyqtary men medıtsınalyq aıyqtyrǵyshtar jetispeıdi – ІІM

ASTANA. QazAqparat – QR Іshki ister mınıstri Marat Ahmetjanov zorlyq-zombylyq qurbandaryna arnalǵan daǵdarys ortalyqtary men mas turǵyndardy ustaıtyn oryndar jetispeıtinin aıtty, dep habarlaıdy QazAqparat tilshisi.

«Keshe Úkimet otyrysynda elimizde daǵdarys ortalyqtarynyń jetkiliksizdigi máselesin kóterdim. Sebebi zorlyq-zombylyq qurbandarynyń baratyn basqa jeri joq. Sondaı-aq daǵdarys ortalyqtary 1 kúndik meken ǵana emes, onda tıisti jaǵdaı jasalýy tıis. Sondyqtan biz atalǵan máseleni keńinen qarastyramyz.

Sonymen qatar bizde medıtsınalyq aıyqtyrǵyshtar jetispeıdi. Atalǵan oryn agressordy bólek ustaý úshin qajet. Óıtkeni aıyptyny bólek qamamasa, ol osyǵan deıin jasaǵanyn jalǵastyrýy múmkin», - dedi Marat Ahmetjanov.

Mınıstrdiń aıtýynsha, turmystyq zorlyq-zombylyqqa alyp keletin taǵy sebep, otbasynyń áleýmettik jaǵdaıy.

«Jumyssyzdyq, otbasy tabysynyń jetispeýinen daý týyndap jatady. Onyń arty urys-keris, zorlyq-zombylyqqa alyp kelip jatatyn jaıttar bar. Sol sebepti bul másele keshendi sheshimdi qajet etedi. Degenmen máseleniń zańdy qatańdatý arqyly sheshilmeıtinin umytpaý kerek. Sebebi problemanyń tamyry tereńde jatyr», - deıdi ol.

Aıta ketsek, qazir Astanada turmystyq zorlyq-zombylyqtyń aldyn alý máselelerine arnalǵan quqyqtyq forým ótip jatyr.

Atalǵan sharaǵa Senat pen Májilis depýtattary, Іshki ister mınıstri, Ádilet mınıstri, Aqparat jáne qoǵamdyq damý mınıstri, Bas prokýrordyń orynbasary jáne azamattyq qoǵamdyq uıymdar ókilderi qatysýda.