Elimizde Covid-19 juqtyrǵan 6 syrqattyń densaýlyq jaǵdaı áli aýyr
Bul týraly Ortalyq kommýnıkatsııalar qyzmetinde eldegi koronavırýstyq ınfektsııaǵa qatysty aǵymdaǵy jaǵdaı jáne Qazaqstandaǵy vaktsınalardyń sapasy men satyp alý máselesine qatysty ótken brıfıngte aıtyldy, dep habarlaıdy QazAqparat tilshisi.
«Qazirgi ýaqytta koronavırýspen aýyratyn barlyǵy 4298 naýqas tirkelgen. Onyń jartysy Almaty jáne Nur-Sultan qalalarynda. 1279 naýqas emdelip, jazylyp, úılerine shyǵaryldy. Qazirgi ýaqytta statsıonarda 2897 syrqat em alýda. Oladyń 85% qalypty jaǵdaıda, 14% ortasha qalyptaǵy jaǵdaıda jáne 25 syrqat aýyr, al 6 syrqat óte aýyr jaǵdaıda. Onyń ishinde 7 syrqat jasandy tynys alý apparatyna qosylǵan», - deıdi QR DSM Taýarlar men kórsetiletin qyzmetterdiń sapasy men qaýipsizdigin baqylaý komıtetiniń tóraǵasy Tımýr Sultanǵazıev.
Onyń aıtýynsha, sońǵy eki aptada koronavırýspen aýyrǵandar sanynyń ósimi 7% aspaǵan.
«Al sońǵy úsh kúnde koronavırýspen aýyrǵandar sany 3%- asqan joq. Aýyrǵan 4298 adamnyń 57%-ynda aýrý skrınıngtik zertteý jumystaryn belsendi túrde júrgizgen kezde, 37%-ynda medıtsınalyq kómekke júgingen kezde anyqtalǵan. Al shetelden juqtyryp kelgenderdiń úlesi 7,2%. Sondaı-aq, bizdegi memlekettik jáne jekemenshik zerthanalar testten ótkizýde. Táýligine 19 000 test jasalsa, aıdyń sońyna deıin kúnine 25 000 test júrgiziledi», - deıdi ol.