Elimizde bıýdjet shyǵystarynyń negizgi úlesi áleýmettik salaǵa baǵyttalady
«Jalpy, 2024 jylǵa túsimder 20,4 trln teńge deńgeıinde qarastyrylyp otyr. Transfertterdi eseptemegende, 2024 jylǵa arnalǵan kirister 16,1 trln teńge nemese túsimderdiń jalpy somasynyń 80% kóleminde josparlanyp otyr. Kelesi jyly Ulttyq qordan 3,6 trln teńge kóleminde transfert tartý josparlanǵan, onyń ishinde nysanaly transfert - 1,6 trln teńge. Atalǵan qarajat áleýmettik mańyzdy jáne strategııalyq ınfraqurylymdyq jobalardy qarjylandyrýǵa baǵyttalady», - dedi A. Beısenbekuly.
Bul turǵyda avtomobıl joldaryn, jylý, gaz jáne sýmen jabdyqtaý jelilerin, ınjenerlik jelilerdi jańǵyrtý, sondaı-aq «Jaıly mektep», «Aýylda densaýlyq saqtaýdy jańǵyrtý» ulttyq jobalary aıasynda birqatar áleýmettik obektilerdi salý eskerilgen.
«2024 jyly bıýdjet tapshylyǵy jalpy ishki ónimge shaqqanda 2,6% deńgeıinde eskerilgen, al 2026 jylǵa qaraı 2,3 paıyzǵa deıin birtindep tómendeıdi. Bıýdjettiń 2024 jylǵa arnalǵan shyǵystary
2023 jylmen salystyrǵanda 1,5 trln teńgege ulǵaıyp, shamamen 24 trln teńgeni quraıdy. Atap aıtqanda, bıýdjet shyǵystarynyń negizgi úlesi áleýmettik salaǵa tıesili jáne 2024 jylǵy bıýdjet shyǵystarynyń 40 paıyzdan astamyn quraıdy. 2024 jylǵa áleýmettik tólemderge arnalǵan shyǵystar 5,3 trln teńge somasynda qarastyrylǵan, onyń ishinde bazalyq zeınetaqy men járdemaqyny ınflıatsııa deńgeıine, yntymaqty zeınetaqyny ınflıatsııadan 2%-ǵa artyp ındeksteldi. Balalary bar otbasylardy qoldaý úshin bala kútimi kezeńi 1,5 jasqa deıin ulǵaıtyldy, 2023 jyldan bastap 93 myńǵa jýyq kóp balaly analarǵa járdemaqy kóbeıtildi. Osy maqsatqa 2024 jyly 93,3 mlrd teńge kózdelgen. Sondaı-aq Memleket basshysynyń tapsyrmasyna sáıkes áıelderdiń zeınetkerlik jasy 61 jas deńgeıinde 2028 jylǵa deıin qaldy. Bul 150 myńnan astam adamǵa qatysty bolady jáne esepti kezeńde 473 mlrd teńgege jýyq qarajatty qajet etedi», - dedi vıtse-mınıstr.
Onyń aıtýynsha, halyqtyń tabysyn arttyrý baǵdarlamasyn iske asyrý úshin 2024 jyly 3,5 trln teńge qarastyrylǵan.
