Elimizde byltyrǵy jylmen salystyrǵanda jol apaty azaıǵan

ASTANA. QazAqparat - Byltyrǵy jylmen salystyrǵanda jol apaty oqıǵalary men jaraqat alý jaǵdaılary azaıǵan, dep málim etti QR Bas prokýratýrasynyń resmı ókili Nurdildá Oraz.

«Osy jyly elimizde 15,5 myńnan astam jol-kólik oqıǵalary bolyp, 22 myńnan astam adam zardap shekken. 2 089 adam qaza bolǵan, bul kórsetkish 2015 jyldyń osy kezeńimen salystyrǵanda 1,5%-ǵa azaıǵan.

Zardap shekkenderdiń jalpy sanynyń 17,8%-y - balalar. Qoǵamdyq kóliktiń qatysýymen  973 JKO bolǵan, 89 adam qaza bolǵan jáne 1 375 adam jaraqat alǵan. 500-den astam jaǵdaıda avtobýstardyń júrgizýshileri kináli», dedi qadaǵalaý organynyń resmı ókili.

Aıta keterligi, Bas prokýratýra janyndaǵy quqyq qorǵaý organdary akademııasy ýákiletti memorgandar men úkimettik emes sektordyń sarapshylarymen birlesip Jol qaýipsizdiginiń ulttyq tujyrymdamasy jobasyn ázirledi.

Jobanyń negizgi maqsaty - 2020 jylǵa qaraı Qazaqstanda JKO-dan bolatyn ólim-jitimdi 100 myń turǵynǵa shaqqanda 6 adamǵa deıin azaıtý, perspektıvada jol apattarynan bolatyn ólim-jitimniń mınımaldy deńgeıine qol jetkizý.