Elimizde boranǵa baılanysty birneshe baǵyttaǵy joldar jabyldy
ASTANA. QazAqparat - Aýa raıynyń qolaısyzdyǵyna baılanysty respýblıkalyq mańyzy bar avtojoldarda kólik qozǵalysyna shekteý qoıyldy, dep habarlaıdy «Qazaqavtojol» baspasóz qyzmeti.
Atap aıtqanda, Almaty oblysynda boranǵa baılanysty kelesi jol ýchaskelerinde qozǵalysqa shekteýler qoıyldy: - Barlyq kólik túrleri úshin «Úsharal-Dostyq» avtojolynyń 83-165 shaqyrymy «Kóktýma-Dostyq» ýchaskesi; - Avtobýstar men úlken júk kólikteri úshin «Almaty - Óskemen» tasjolynyń 287-558 shaqyrymynda ornalasqan Taldyqorǵan - Úsharal baǵytyndaǵy jol bóligi.
Qostanaı oblysynda boranǵa oraı «Denısovka - Jitiqara - Múktikól - Reseı shekarasynda» barlyq kólikter úshin kólik qozǵalysy shekteldi. «Karabutak-Rýdnyı-Qostanaı» avtojolynyń 231-503 shaqyrymy, Rýdnyı qalasy men Aqtóbe oblysy shekarasyna deıingi jol bóligi jabyldy. Sonymen qatar «Qostanaı-Áýlıekól-Surǵan» tasjolynyń 7-232 shaqyrymy, Qostanaı qalasynan bastap, Aqmola oblysynyń shekarasyna deıingi ýchaskesinde kólikterge júrýge bolmaıdy.
Dızel otynymen júretin kólikter úshin «Mamlıýt-Qostanaı» jolynyń 180-404 shaqyrymy, Qostanaı qalasy jáne Soltústik Qazaqstan oblysy shekarasy, «Ekaterınbýrg - Almaty» tasjolynyń Qostanaı qalasy jáne Aqmola oblysyna deıingi jol jabyq.
Aqtóbe oblysynda boranǵa baılanysty avtokóliktiń barlyq túrleri úshin kelesi jol ýchaskelerinde qozǵalysqa shekteýler qoıyldy: - Komsomol-Qostanaı oblysy jol ýchaskesi;
- «Aqtóbe-Reseı Federatsııasy» tasjolynyń 21-135 shaqyrymy;
- Aqtóbe qalasy - Qarabutaq, Qarabutaq - Komsomol, Qandyaǵash - Embi ýchaskeleri.
Soltústik Qazaqstan oblysy boıynsha keshe keshke dızeldik jáne jolaýshylar tasymaldaıtyn kólikterge barlyq baǵyttar boıynsha jolǵa shyǵýǵa shekteý qoıyldy.
Qaraǵandy oblysynda barlyq kólikter úshin Qyzylorda oblysy shekarasynan bastap, Jezqazǵan qalasyna deıingi jol jabyldy. Kerisinshe, Saryshaǵan - Balqash qalasy arasyndaǵy ýchaskede kólikter úshin kólik qozǵalysy búgin tańerteń ashyldy.
Qyzylorda oblysy keshe keshke «Qyzylorda-Ýspen-Reseı Federatsııasynyń shekarasy» tasjolynyń Qyzylorda qalasy jáne Qaraǵandy oblysynyń shekarasy arasyndaǵy jol bóligi barlyq avtokólikter úshin jabylǵan bolatyn. Búgin tańerteń atalmysh shekteý alynyp tastaldy.
