Elimizde bıznes klımatty jaqsartýda júıeli jumystar júrgizilýde - Rústam Júrsinov

NUR-SULTAN. QazAqparat – Salyqtyq quqyqtyq qatynastar ásirese bıznes úshin eń kúrdeli ári sezimtal salalardyń biri bolyp sanalady. Bizdiń mindetimiz - eldiń Salyq kodeksin múmkindiginshe qarapaıym etý. «Saıası reformalardyń jańa prezıdenttik paketi» atty saraptamalyq talqylaýda mundaı pikirdi Qazaqstandaǵy kásipkerlerdiń quqyǵyn qorǵaý jónindegi ýákil Rústam Júrsinov bildirdi, dep habarlaıdy QazAqparat tilshisi.

«Bıznesti retteý jumysy dáıekti ári birtindep atqarylýda. Elimizde bıznes klımatty jaqsartýda júıeli jumys júrgizilip keledi. Byltyr kúzgi sessııanyń ashylýynda - 1 qyrkúıekte Memleket basshysy dástúrli túrde kásipkerlik ortany memlekettik turǵyda retteýdi jetildirý máselesine basa nazar aýdardy. Bul jumys jalǵasýda. Ótkendi sholyp shyǵar bolsaq, Elbasynyń birden iskerlik ortany jaqsartý jónindegi túbegeıli sharalary týraly Jarlyǵyn eske túsiremiz. Aýqymdy jumys atqaryldy. Eń birinshi kezekte, Kásipkerlik kodeks jáne habarlamalarǵa ruqsat berý týraly zań qabyldandy», - dep atap ótti Rústam Júrsinov.

Onyń aıtýynsha, osy zań qabyldanǵanǵa deıin búkil elde 1115 lıtsenzııa men ruqsat kúshinde bolǵan. Atqarylǵan jumystyń nátıjesinde onyń 73%-y qysqartylǵan. Qazir shamamen 260-y qaldy.

«Bir kezde biz bızneske qanshalyqty talap qoıatynymyzdy esepteı bastadyq. Bul jumysqa shamamen bir jylǵa jýyq ýaqyt jumsaldy. 30 myń 540 sanyna toqtaldyq. Tipti bizdiń apparattyń kúshimen bızneske qoıylatyn barlyq talapty eseptep shyǵý múmkin emes. Olardyń sanyn 50% qysqartyp, 13 myńyn qaldyrdyq. Alaıda óz jumysymyzǵa taldaý jasaı otyryp, bizde nelikten túbegeıli ózgerister joqtyǵyn túsingimiz keldi. 2015 jyly 215 myń kásipker ákimshilik aıyppulǵa tartyldy. 2019 jyly bul san 503 myńǵa deıin ósti. Eger statıstıkany alar bolsaq, bizde tek 1 mıllıon 300 kásipker bar. Quqyqbuzýshyny ár sekýnd saıyn anyqtaýǵa bolady. Biraq bul durys emes. Barlyq talapty bilý múmkin emes», - deıdi kásipkerler quqyǵyn qorǵaý jónindegi ýákil.

Rústam Júrsinovtyń paıymdaýynsha, kásipkerlik salany retteýdiń negizgi, ıaǵnı bazalyq qaǵıdattaryn uǵynyp alý abzal.

«Aqyr sońynda, kásipkerlik degen erkindikti talap etetini belgili. Múmkindiginshe kez-kelgen baılanysty azaıtý kerek. Sonda ǵana jańa ekonomıkalyq saıasatty jolǵa qoıa alamyz. Sondyqtan Memleket basshysy óziniń nazaryn osynaý ózara baılanystar adamnyń ómiri men densaýlyǵyna, ekologııaǵa, ulttyq qaýipsizdikke qaýip-qater týyndaǵan jaǵdaıda ǵana bolýy kerektigine aýdardy. Mine, sol sebepti 31 jeltoqsanda Prezıdent tıisti jarlyqqa qol qoıyp, retteýshi gılotına tujyrymdamasyn engizdi. Barlyq memlekettik organ 2024 jylǵy 1 qańtarǵa deıin emtıhan tapsyryp, óz talaptaryn qorǵaýy kerek. Eger olar emtıhannan súrinse, onda 2024 jyldyń 1 qańtarynan bastap olar osy talaptar úshin eshkim ákimshilik jaýapkershilikke tartylmaıdy. Bul barlyq memlekettik organdarǵa negizgi talaptarǵa sáıkestik aýdıtin júrgizýge túrtki bolady», - dep túsindirdi Rústam Júrsinov.