Elimizde bıyl 40 bala men jasóspirim sýǵa ketken

ASTANA. QazAqparat – Elimizde ótken jylǵa qaraǵanda adamdardyń sýǵa batyp ketý kórsetkishi azaıǵan. Degenmen, bıyl da sýǵa ketý faktileri bar. Bul týraly Tótenshe jaǵdaılar mınıstrligi Azamattyq qorǵanys jáne áskerı bólimder komıteti tóraǵasynyń orynbasary, general-maıor Ularbek Abykeev málim etti, dep habarlaıdy QazAqparat tilshisi.

«Sý aıdyndarynda shomylý qaýipsizdigi boıynsha júrgizilip jatqan jumystarǵa qaramastan, bıyl jyl basynan beri 144 adam sýǵa batyp ketti (ótken jylmen salystyrǵanda 17% tómendegen). Sýǵa ketkenderdiń ishinde 40 kámelet jasyna tolmaǵandar boldy. Sonymen qatar, jyl basynan beri 161 adam sýǵa batýdan qutqaryldy, olardyń ishinde 56 kámeletke tolmaǵan bar. Taldaý jumystary kórsetkendeı, sýda ólimge alyp keletin basty sebepterdiń biri - adamdardyń, ásirese balalardyń qaýiptiń baryn túsinbeýi», - dedi Ularbek Abykeev Ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, sýǵa batý faktileriniń 97%-y shomylýǵa tyıym salynǵan jerlerde tirkeledi.

«Shomylýǵa ruqsat etilgen oryndar týraly málimetter BAQ-ta, ákimdikter men ár óńirdiń tótenshe jaǵdaılar departamentiniń resmı saıttarynda ornalastyrylǵan. Osy ýaqytta deıin atqarylǵan profılaktıkalyq, keshendi jumystardyń qorytyndysyna sáıkes bıyl sýǵa batý faktileri azaıǵan. Ókinishke qaraı, sońǵy 3 jylda sý 1 100-den astam adamnyń ómirin qıdy, olardyń arasynda 321 bala boldy», - deıdi TJM ókili.