Elimizde bitimgershilik kúshterdiń oqý-jattyǵýy bastaldy
Alǵash ret keshendi bitimgershilik oqý-jattyǵýy N.Tilendıev aýylyndaǵy oqý-jattyǵý ortalyǵy bazasynda ótkizildi.
Oǵan Desanttyq-shabýyldaý áskerleriniń, Áskerı-áýe kúshteriniń, Áskerı polıtsııanyń, áskerı medıtsınalyq mekemelerdiń, sondaı-aq QR Qarýly Kúshterin mınasyzdandyrý ortalyǵynyń bólimsheleri qatysady.
Bul oqý-jattyǵý bitimgershilik kúshterdiń daıyndyq deńgeıin baǵalaý, áskerı qyzmetshilerdiń beıbitshilikti qamtamasyz etý jónindegi mindetterdi oryndaýdy uıymdastyrýdaǵy daǵdylaryn jetildirý maqsatynda ótkiziledi.
Bitimgershilik bólimsheleriniń jeke quramy baqylaý-ótkizý jáne baqylaý pýnktterinde qyzmet atqarý, jergilikti jerler men eldi mekenderdi patrýldeý, mańyzdy nysandardy kúzetý jáne mınasyzdandyrý jónindegi mindetterdi pysyqtaıdy.
Oqý-jattyǵý ótip jatqan oqý ortalyǵy jeke quramdy oqytýǵa, bitimgershilik mıssııany oryndaý kezinde áskerı qyzmetshilerge qajetti negizgi daǵdylardy ázirleýge arnalǵan polıgon bolyp tabylady. Atalmysh polıgonda «Qazpolk» bólimsheleri, BUU qamqorlyǵymen álemniń túrli núktelerine jiberý úshin qurama kontıngent, sondaı-aq áskerı baqylaýshylar retinde shetelge jiberiletin ofıtserler áskerı oqýdan ótedi.
Oqý-jattyǵýǵa qatysýshylardyń arasynda bitimgershilik mıssııalarda tájirıbe jınaǵan áskerı qyzmetshiler de bar. Halyqaralyq mindetter men mindettemelerdi oryndaý, sheteldik áriptestermen ózara is-qımyl jáne tájirıbe almasý protsesinde alǵan qundy bilim men daǵdylar Qarýly Kúshterde, onyń ishinde osyndaı oqý-jattyǵýlar barysynda qoldanylady.
Keshendi bitimgershilik oqý-jattyǵý 8 qazanyna deıin jalǵasady.
