Elimizde bırjalyq saýdanyń biryńǵaı qaǵıdalary bekitilmek

NUR-SULTAN. QazAqparat – Bırjalyq saýdanyń Biryńǵaı qaǵıdalary bekitiledi. Bul týraly Májilistiń jalpy otyrysynda bırjalyq saýdany damytý jáne jetildirý máseleleri boıynsha zań jobasyn talqylaý kezinde Saýda jáne ıntegratsııa mınıstri Baqyt Sultanov málim etti, dep habarlaıdy QazAqparat tilshisi.

«Qazirgi ýaqytta taýar bırjalary brokerler men dılerlerdi akkredıtteýdi, sondaı-aq satyp alýshylar men satýshylardyń bir bırjadan ekinshisine aýysýyn qıyndatatyn ártúrli talaptarmen ózderiniń ishki bırjalyq saýda erejelerin belgileıdi. Básekelestikti jáne taýar bırjasyna teń qoljetimdilikti arttyrý maqsatynda zań jobasynda bırjalyq saýdanyń Biryńǵaı qaǵıdalaryn bekitý kózdelgen. Sondaı-aq onda: brokerler men dılerler úshin dıskrımınatsııalyq sharttar men erejelerdi alyp tastaý jónindegi normalar, satyp alýshylar men satýshylar úshin saýda sharttary men rásimderin aýystyrmastan bırjany erkin ózgertý múmkindigi qarastyrylǵan», - dedi B. Sultanov.

Onyń aıtýynsha, bul rette, Biryńǵaı qaǵıdalarmen olarǵa jekelegen talaptar qoıa otyryp, taýarlar men

saýda-sattyqty sektsııalar boıynsha bólý belgilenetin bolady.

«Sonymen qatar, zań jobasynda taýar bırjasyna brokerlerdiń jasalǵan kelisimderiniń kólemine qaraı saralanǵan bırjalyq alym belgileý quqyǵy kózdelgen. Engiziletin norma turaqty saýda júrgizetin satýshylar men satyp alýshylarǵa bırjalyq alym stavkalaryna jeńildik alýǵa múmkindik beredi, bul olardyń bırjalyq saýda kólemin ulǵaıtýǵa múddeliligin arttyrady», - dedi vedomstvo basshysy.

Budan buryn habarlanǵandaı, qazirgi ýaqytta Qazaqstanda 19 taýar bırjasy lıtsenzııalanǵan.