Elimizde biryńǵaı qaıyrymdylyq jasaý platformasy paıda bolady
«Biz joba ataýyn Amal dep atadyq. Bul sóz biz júzege asyratyn jobany jaqsy sıpattaıdy. Biz qaıyrymdylyq jasaý mádenıetin dáriptep, aǵa býynnyń jastarmen tájirıbe bóliskenin qalaımyz. Koronavırýs pandemııasy kezinde bul tipten ózekti máselege aınaldy», - deıdi Ulan Ábishev onlaın ótken konferentsııada.
Onyń aıtýynsha, bul joba qaıyrymdylyqpen baılanysty protsesterdi bir júıege keltirýge baǵyttalǵan.
«Qazirgi ýaqytta kómek kórsetetin qor, uıym kóp, biraq ol týraly aqparattar júıelenip turatyn alań joq. Biz arnaıy saıt ashyp, qaıyrymdylyq sharalary týraly aqparattardy jınap, ár sanat boıynsha júıelep ornalastyramyz. Bul qaıyrymdylyq jasaıtyndar men kómekke muqtaj adamdar úshin óte yńǵaıly bolady. Ol jerde kómek kórsetilgen adamdardyń jáne kómekke muqtaj adamdardyń baılanys nómiri bar», - deıdi ol.
Ol aldaǵy ýaqytta áleýmettik jelilerde de iske asyratyn jobalar bar ekenin aıtty.
«Qazirgi ýaqytta Facebook, Instagram, Vkontakte sııaqty ártúrli áleýmettik jeli bar. Ol jerde jastarǵa, balalarǵa baǵyttalǵan vıdeojazbalar qoıamyz, sonyń ishinde jobamyzdy Tik-Tok platformasynda da júzege asyramyz», - deıdi qoǵamdyq uıym basshysy.