Elimizde birqatar zań zaman talabyna saı jańardy - saıasattanýshy
NUR-SULTAN. QazAqparat – Bıyl Qazaqstanda zaman talabyna saı birqatar zańdar jańardy. Saıasattanýshy Qazbek Maıgeldınov elimizde oryn alǵan saıası jáne qoǵamdyq oqıǵalarǵa qatysty osyndaı pikir bildirdi, dep habarlaıdy QazAqparat tilshisi.
«Bıyl elimizde oryn alǵan saıası oqıǵalardyń biri - Ulttyq keńes músheleriniń belsendi jumys isteýi. Onyń dáleli elimizde birqatar saıası paket qabyldandy. Naqty aıtqanda, saılaý týraly zańǵa ózgeristiń engizilýi, ol óz kezeginde elimizdegi saıası partııalardyń róli men ornyn aıqyndap berdi. Oǵan dálel bıylǵy praımerızdiń nátıjesi. Elimizde eski zańdar jańaryp, tyń kózqaraspen jumys istep jatyr . Sebebi zaman talaby solaı», - dedi Qazbek Maıgeldınov.
Onyń aıtýynsha, álemdegi jáne eldegi saıası jáne pandemııalyq jaǵdaılarǵa qaramastan biz saıası turaqtylyǵymyzdy saqtap kelemiz.
«2020 jyly memlekettik saıasattyń negizgi algorıtmderin anyqtaýdy jáne belgileýdi jalǵastyryp kelemiz. Jyl boıy bul protsester senimdi túrde atqarylyp keledi. Bir ǵana Memleket basshysynyń ózi keminde 150 ishki saıası kezdesý ótkizdi. Bul rette ol tek basqarýshy ısteblıshmentpen ǵana emes, sonymen birge qoǵam qaıratkerlerimen de belsendi kezdesip otyrdy. Sonymen qatar, elimizde oryn alyp jatqan negizgi oqıǵalarǵa ýaqtyly baǵa berilip, kún tártibindegi ózekti taqyryptar boıynsha bılik tarapynan úndeý jasalyp keledi. Munyń bári Prezıdenttik ınstıtýttyń bılik pen sheshim qabyldaý qurylymynda sheshýshi ról atqarýynyń kórsetkishi», - deıdi ol.
Aıta ketsek, búgin elordadaǵy Eýrazııalyq ıntegratsııa ınstıtýtynda «Turaqsyz álemdegi turaqty memleket»: Q.K. Toqaevtyń 2020 jylǵy basty jeti isi» atty baǵdarlamany talqylaýǵa arnalǵan is-shara ótti. Oǵan saıasattanýshylar, qoǵam qaıratkerleri men ǵalymdar qatysty.
