Elimizde bir jasqa tolmaǵan 10 myń búldirshinniń atynda depozıt bar
Qazirgi kezde osy qyzmetti paıdalanyp, 164 817 ata-ana óz balalaryna esepshot ashqan. Al, dál osydan bir jyl buryn banktegi balalar depozıtiniń sany 144 682-ni quraǵan bolatyn. Negizinen, banktegi shottar 1 jastan 10 jasqa deıingi sábılerge ashylǵan. Qazirgi sátte osy jas aralyǵyndaǵy balalardyń atynda 88 761 depozıt bar. Ekinshi orynda turǵandar – Turǵyn úı qurylys jınaq bankiniń 10 jastan 18 jasqa deıingi salymshylary. Olarǵa ashylǵan jalpy depozıt sany – 65 480. Al, úshinshi kezekte - banktiń eń kishkentaı klıentteri, ıaǵnı, 1 jasqa deıingi sábıler. Olardyń atyna búginde 10 576 depozıt ashylǵan.
«Jalpy, jyl saıyn balalar depozıtine degen suranys ásirese kúz aıynda, atap aıtsaq, balalardyń mektepke baratyn kezinde erekshe baıqalady. Dál osy sátte kópshilik ata-ana balalarynyń ósip kele jatqanyn eskerip, olardyń jarqyn bolashaǵy úshin jaǵdaı jasaý kerektigi jóninde sheshim qabyldaıdy (máselen, turǵyn úıge ınvestıtsııa salý). Sondyqtan, olar Turǵyn úı qurylys jınaq bankinde depozıt ashyp, qarajat jınaqtaı bastaıdy. Al bank, óz tarapynan árbir salymshynyń jınaǵan aqshasyna jyl saıyn memlekettik syıaqy men bank syıaqysyn tóleıdi. Munyń bári birigip salym boıynsha jyldyq 13% kólemindegi jyldyq tıimdi mólsherlemeni quraıdy» delingen habarlamada.
Taǵy bir aıta ketetin jaıt, balalar 18 jasqa tolǵanda keremet jeńildikterdiń birine, ıaǵnı, jyldyq 3,5%-dan 5%-ǵa deıingi mólsherlememen turǵyn úı zaımyn nesıege alý múmkindigine ıe bolady.
Balalarǵa arnalǵan depozıtti árbir ata-ana ózine yńǵaıly kez kelgen jerde jáne ýaqytta, tipti perzenthanada da ashýyna bolady. Ol úshin tek bank keńesshisin shaqyrtý jetkilikti. Al, depozıtti ashar kezde sábıdiń týý týraly kýáligi men onyń ata-anasynyń bireýiniń jeke kýáligi qajet.
Jalpy, balalar depozıti - kez kelgen sábıdiń bolashaq baspanasyna qarajat jınaqtaýdyń tamasha múmkindigi. Ol, sondaı-aq, «Otbasylyq pakettiń» bir bóligi retinde qarajat tabystylyǵyn arttyryp, óz úıine qarajat jınap jatqan otbasynyń turǵyn úı zaımyn tezirek alýyna jol ashady.
