Elimizde bir kúnde úsh bala terezeden qulap ketti
NUR-SULTAN. QazAqparat - Keshe 17 mamyr kúni Qazaqstanda 3 búldirshin terezeden qulap ketti, dep habarlaıdy QazAqparat Tótenshe jaǵdaılar komıtetiniń baspasóz qyzmetine silteme jasap.
17 mamyr kúni Pavlodar oblysynyń Efremovka aýylynda bes qabatty turǵyn úıdiń ekinshi qabatynyń terezesinen 2016 jyly jáne 2018 jyly týǵan eki bala qulap ketken. Olar eresekterdiń qaraýynsyz, úıde ońasha qalyp qoıǵan. Ekeýi de shuǵyl arada aýrýhanaǵa jetkizildi.
Osy kúni Qostanaı qalasyndaǵy Abaı dańǵylynda ornalasqan bes qabatty turǵyn úıdiń ekinshi qabatynda úıde úlkender joq kezde 2014 jyly týǵan ul bala terezeden qulap ketti. Búldirshin aýrýhanaǵa jatqyzylǵan.
Tótenshe jaǵdaılar komıteti mundaı oqıǵalar kóp jaǵdaıda úıde eresekter joq kezde bolatynyn eske salyp, onyń aldyn alý úshin mynadaı saqtyq sharalaryn umytpaýdy eskertedi:
- Kishkentaı balalardy úıde ońasha qaldyrmańyzdar. Shybyn-shirkeıdi ótkizbeıtin torǵa eshqashan senbeńizder. Ol balalardy qorǵaýǵa arnalmaǵan. Kerisinshe, mundaı tor osyndaı jaǵdaıǵa sebepker bolady, óıtkeni bala ony berik dep oılap, terezege súıengendeı oǵan da súıenedi. Múmkindiginshe terezeni tómengi emes, joǵarǵy jaǵynan ashqan durys. Balaǵa terezeden birdeńe kórsetkende, ony myqtap ustap turyńyz, búldirshinniń oqys qımylyna árqashan daıyn bolyńyz. Alaqany qurǵaq bolýy kerek. Balany kıiminen ustamańyz. Bólmeni jeldetkende balanyń kóz aldyńyzda júrýin qadaǵalap, janyńyzda ekenine kóz jetkizińiz. Balalardyń balkonǵa úlkendersiz, óz betinshe shyǵýyna tyıym salyńyz. Eshqashanda uıyqtap jatqan balany jalǵyz ózin tastap ketýge bolmaıdy. Sebebi, bala oıanyp, ashyq turǵan terezege barýy múmkin. Kereýetten bastap barlyq jıhazdy terezeden aýlaqqa jyljytyp qoıyńyz. Bul balanyń eńbektep, órmelep, terezeniń aldyna baryp otyrýyna jol bermeıdi.
