Elimizde bir aı boıy týberkýlezben belsendi kúres sharalary atqarylady
ASTANA. QazAqparat - Búgin elimizdiń barlyq óńirlerinde Búkilálemdik týberkýlezben kúres kúnine oraı týberkýlezdiń aldyn alý jónindegi aılyq bastaldy, dep habarlaıdy QazAqparat.
«Aılyq aıasynda respýblıka boıynsha medıtsınalyq-sanıtarııalyq alǵashqy kómek uıymdarynda beıindi mamandardy shaqyrtý arqyly ashyq esik kúnderin ótkizý, medıtsınalyq qyzmetkerler úshin týberkýlezdiń aldyn alý jáne erte dıagnostıkalaý jóninde oqytý semınar-trenıngterin uıymdastyrý, densaýlyq mektepterinde ımmýnıtetti nyǵaıtý, fızıkalyq belsendilik pen durys tamaqtanýdy nasıhattaý jumystary jalǵastyrylatyn bolady»,-dep atap ótilgen QR Densaýlyq saqtaý mınıstrliginiń málimetinde.
Atap aıtqanda, halyqqa týberkýlezge qarsy kórsetiletin kómektiń sapasyn ári qaraı jetildirý úshin Dúnıejúzilik densaýlyq saqtaý uıymynyń týberkýlezdi joıýdyń 2016-2035 jyldarǵa arnalǵan strategııasyna sáıkes, týberkýlezdi baqylaýdyń 2016-2025 jyldarǵa arnalǵan biriktirilgen baqylaý úlgisi jasaldy. Ol 2016-2019 jyldarǵa arnalǵan «Densaýlyq» memlekettik baǵdarlamasynyń negizgi qaǵıdalarymen sáıkestendirilgen. DDSU men Halyqaralyq týberkýlezben kúres odaǵynyń saıasatyn ustana otyryp, elimizdegi týberkýlezben kúres sharalary alǵashqy medıtsınalyq-sanıtarııalyq kómek jelisimen biriktirildi.
Vedomstvo derekterine qaraǵanda, 2016 jyldyń qorytyndysyna sáıkes, týberkýlez boıynsha epıdemıologııalyq jaǵdaı turaqty bolyp otyr. Ótken jylǵy málimetterge súıensek, ólim-jitim kórsetkishi 17,1 paıyzǵa tómendep, 100 myń turǵynǵa shaqqanda 3,4 boldy (2015 jyly - 4,1 ). Negizgi epıdemıologııalyq kórsetkishtiń tómendeýi turǵyndardyń barlyq jas shamasynda baıqalady.
Esterińizge sala keteıik, Búkilálemdik týberkýlezben kúres kúni jyl saıyn 24 naýryzda atalypp ótedi.
