Elimizde bir apta ishinde 2705 qylmys tirkelgen
Bul jaıynda Іshki ister mınıstrliginiń ókili Shuǵyla Turlybek vedomstvonyń onlaın brıfınginde málim etti.
«Bir apta ishinde 2705 qylmys jasaldy. Onyń 1620-sy táýlik ishinde ashyldy. Polıtsııa qyzmetkerlerli izin sýytpaı 1 kisi óltirýdi, 1 ólimge ákep soqqan densaýlyqqa qasaqana aýyr zııan keltirýdi, 1 qaraqshylyq jáne 29 tonaý, 391 bóten múlikti urlaý qylmystaryn ashty», - dedi mınıstrlik ókili.
Sondaı-aq, Shuǵyla Turlybek Petropavl qalasynda adam saýdasymen aınalysqan Aqmola oblysynyń týmasy ustalǵanyn aıtty.
«Jedel-izdestirý sharalary kezinde kúdiktiniń ınternet pen áleýmettik jeli arqyly materıaldyq jaǵdaıy aýyr qyzdardy, onyń ishinde qolaısyz jáne tolyq emes otbasylardan shyqqan kámeletke tolmaǵandardy izdeýmen aınalysqany anyqtaldy.
Osydan keıin, ol álgi qyzdarmen tanysyp, jumys tabýǵa kómektesetinin aıtyp, Petropavl qalasyna shaqyryp otyrǵan.
Qyzdar qalaǵa kelgennen keıin olarǵa psıhologııalyq qysym jasap, qorqytyp jáne fızıkalyq zorlyq-zombylyq kórsetip, jynystyq qanaý men saýdaǵa paıdalanǵan.
Atalǵan shema boıynsha kúdikti Qostanaı qalasynyń 19 jastaǵy turǵynyn jaldap, ony odan ári qaladaǵy saýnalar men qonaq úılerde ıntımdik qyzmekte paıdalaný úshin 250 myń teńgege satqan», - dedi ol.