Elimizde bilim mekemelerin lańkestikten qorǵaýdyń arnaıy nusqaýlyǵy bekitildi

NUR-SULTAN. QazAqparat – Elimizde bilim berý uıymdaryn lańkestik áreketterden qorǵaý maqsatynda arnaıy nusqaýlyq ázirlenip, bekitildi. Bul týraly QR ІІM Ákimshilik polıtsııa komıteti basqarmasy basshysynyń orynbasary Jasulan Jumanalın málim etti, dep habarlaıdy QazAqparat tilshisi.

«Bilim berý uıymdarynda balalardyń qaýipsizdigin qamtamasyz etý mańyzdy. Úkimettiń tapsyrmasyna sáıkes, quzyrly jáne qyzyǵýshylyq tanytqan organdar balalar qaýipsizdigin jetildire túsý jolynda birqatar sharalardy atqaryp jatyr. Atap aıtsaq, Bilim jáne ǵylym mınıstrligi jergilikti ákimdiktermen birlesip bilim berý uıymdarynyń tehnıkalyq jabdyqtalýyn qamtamasyz etýde. Búginde bilim berý uıymdarynda jappaı beınebaqylaý kamerasy men dabyl túımeleri ornatylyp jatyr. Sonymen qatar mekemeniń kire berisine tekserý beketi (týrnıket) qoıylǵan. Odan bólek, mekteptegi qaýipsizdikke jaýapty kúzet uıymynyń lıtsenzııasy bolýy mindetti», - dedi Jasulan Jumanalın mınıstrlikte ótken baspasóz máslıhatynda.

Spıkerdiń málimdeýinshe, elimizdegi bilim berý uıymdarynyń deni lańkestik turǵydan osal nysandar qataryna jatady.

«Osy oraıda bıyl naýryzda bilim berý uıymdaryn lańkestik áreketterden qorǵaýdyń arnaıy nusqaýlyǵy bekitildi. Atalǵan nusqaýlyqqa sáıkes, bilim berý uıymdaryn jaraqtandyrý talaptary engizildi. Buǵan deıin biz Bilim jáne ǵylym mınıstrligimen birlesip beınebaqylaý júıesine qatysty talaptardy ázirlegen bolatynbyz. ıAǵnı, bilim mekemelerindegi beınebaqylaý kameralaryn jedel áreket etý ortalyǵymen ıntegratsııalaý kerek», - deıdi ol.

Buǵan deıin habarlaǵanymyzdaı, elimizde balalarǵa qarsy jasalatyn qylmys 17 %-ǵa azaıǵan.