Elimizde biliktiligi joǵary tehnıkalyq mamandyq ıeleri tapshy - dóńgelek ústel otyrysy

ASTANA. Qarashanyń 11-i. QazAqparat /Aıdar Ospanalıev/ - Elimizde biliktiligi joǵary tehnıkalyq mamandyq ıeleri tapshy. Bul orta bilimdi jáne joǵary bilimdi mamandarǵa da qatysty qalyptasqan jaǵdaı.

Búgin «Nur Otan» halyqtyq-demokratııalyq partııasynyń Innovatsııalyq komıteti tóraǵasynyń orynbasary Erlan Aryn «Innovatsııalyq ekonomıkaǵa arnalǵan qazirgi zamanǵy tehnıkalyq jáne kásibı bilim berý» atty taqyryptaǵy dóńgelek ústel otyrysynda osylaı aıtty, dep habarlaıdy QazAqparat.

Onyń sózine qaraǵanda, bilim berý salasy zaman talabyna saı jumys isteýdi endi ǵana úırenip keledi. Qazirgi tańda elimizde eki tehnıkalyq jáne qyzmet kórsetý salasyndaǵy qyzmetkerge 10-12 joǵary bilimdi mamannan keledi. «Bul mamandar daıyndaýdaǵy úlken úılesimsizdik jáne ol bilikti jumysshy kadrlar daıyndaýda  problema týdyryp otyr. Respýblıkanyń aýyldyq aımaqtarynda kásiptik lıtseıler men kolledjderdegi tehnıkalyq mamandyq ıelerine degen memlekettik tapsyrys óte tómen. Onyń ústine qazir lıtseıler men kolledjderde az qamtylǵan, memleketten qomaqty kómekti qajet etetin otbasynyń balalary bilim alýda. Sondyqtan bul baǵytta memleket tarapynan úlken qoldaý qajet», dedi komıtet tóraǵasynyń orynbasary.