Elimizde bes aıda 16 921 kólik qurastyryldy

NUR-SULTAN. QazAqparat - 2019 jyldyń qańtar-mamyrynda elimizde 114 709 mln teńgege 16 921 kólik shyǵaryldy. Bul týraly Qazaqstandyq avtobıznes qaýymdastyǵynan málim etti, dep habarlaıdy QazAqparat tilshisi.

Atalǵan kezeńde 15 773 jeńil kólik, 495 júk kóligi, 404 avtobýs, 270 tirkeme, 19 ózge de mamandandyrylǵan tehnıka qurastyryldy. Al 2018 jyldyń alǵashqy bes aıynda elimizde 71 520 mln teńgege 11 848 kólik quraly shyǵarylǵan bolatyn. Jyl basynan beri qazaqstandyqtar 14,3 myń otandyq kólikti satyp aldy.

«Bıylǵy jyldyń 5 aıynyń ishinde Qazaqstanda qurastyrylǵan avtomobılderdiń satylymy 41 paıyzǵa artty. Buǵan qosa, búkil naryq tek 19 paıyzǵa ulǵaıdy. «Made in Kazakhstan» avtomobılderiniń naryqtaǵy kúlesi 60 paıyzǵa jaqyndap qaldy. Bıylǵy jylǵy úles ósiminiń negizgi qozǵaýshysy Ulttyq banktiń jeńildetilgen avtonesıeleýge qarjylandyrýdy arttyrý sheshimi jáne Qazaqstanda qurastyrylǵan Hyundai avtomobıline suranystyń artýy boldy», - dedi QABQ vıtse-prezıdenti Anar Maqasheva.

Osymen ekinshi aı qatarynan «SaryarqaAvtoÓnerkásip» kólik qurastyrýda kósh bastap keledi. Atalǵan kásiporyn mamyr aıynda 2174 jeńil kólik, júk kóligi jáne avtobýs qurastyrdy. Al «Azııa Avto» kásiporny 1 570 kólik shyǵardy. «KAMAZ Injınırıng» 120 júk kóligin naryqqa jóneltti. «SemAZ» 96 kommertsııalyq tehnıka, Hyundai Trans Auto 23 jeńil kólik, Daewoo Bus 13 avtobýs qurastyrdy.