Elimizde belsendi eksporttaýshylar sany 540-tan asty

NUR-SULTAN. QazAqparat – Elordada Qazaqstan eksporttaýshylarynyń birinshi forýmy ótti, oǵan 70-ke jýyq eksporttaýshy kompanııa qatysty, dep habarlaıdy QazAqparat tilshisi.

QR Saýda jáne ıntergratsııalar mınıstri Baqyt Sultanovtyń aıtýynsha, Qazaqstandaǵy belsendi eksporttaýshylar sany 540-tan asty, bul kórsetkish jyldan-jylǵa artyp keledi.

«Sońǵy úsh jyl barlyq halyqaralyq saýda úshin kúrdeli boldy. Qazirgi ýaqytta COVID-19 saldary men álemdegi geosaıası jaǵdaı Qazaqstannyń da syrtqy saýdasyna yqpal etip otyr. Negizgi problemalar – logıstıkadaǵy irkilister, jalpy iskerlik belsendiliktiń tómendeýi bolyp qala beredi. Reseı-Ýkraına daǵdarysy pandemııalyq shekteýlerden keıin qalpyna kelip úlgermegen jetkizý tizbeginiń úzilýine áser etti. Biz bıznespen belsendi jumys istedik, Eýropalyq Odaq baǵytyndaǵy júkterdiń ótýin qamtamasyz ettik»

, - dedi Baqyt Sultanov forým barysynda.

Mınıstrdiń aıtýynsha, taǵy bir ózekti másele – ótkizý naryqtaryn qaıta baǵdarlaý.

«Búgin forýmǵa qatysatyn kóptegen kásiporyndardyń jańa naryqqa shyǵý úshin qosymsha múmkindik izdep jatqanyn bilemin. Memlekettik qurylymdar da jańa baǵyttar boıynsha eksport múmkindikterin pysyqtaýǵa kiristi»

, - dedi saýda mınıstri.

Forým aıasynda qazaqstandyq eksporttaýshylar sheteldik naryqtarǵa jiberiletin taýarlaryn kórmege shyǵardy. Olardyń arasynda polıpropılen sý súzgileri, janýarlarǵa arnalǵan dıetalyq qospalar, bıo-ıogýrttar men jemis-jańǵaq shokoladtary bar. Barlyq eksporttaýshylar – eksportty memlekettik qoldaý baǵdarlamalarynyń qatysýshylary.

Buǵan deıin Baqyt Sultanov Reseıge qarsy sanktsııalar Qazaqstan eksportyna qalaı áser etkenin aıtqan edi.