Elimizde bazalyq zeınetaqy 2027 jylǵa qaraı 120% artady
«Bıyl 1 qańtardan bastap Qazaqstanda zeınetaqynyń eń tómengi mólsheri – 24 341 teńge, yntymaqty zeınetaqynyń eń tómen mólsheri – 53 076 teńge. Jasy kelip zeınetke shyqqanda zeınetaqy ortasha aılyq kiristi negizge ala otyryp taǵaıyndalady. Taǵy bir jaıt, zeınetaqyny taǵaıyndaýda respýblıkalyq bıýdjet týraly zańda belgilengen aılyq eseptik kórsetkishtiń 55 (189 750 tg) mólsherinen aspaýǵa tıis. Jasy kelip zeınetke shyqqanda zeınetaqy tolyq kólemde kelesi sanattaǵy adamdarǵa beriledi. Erlerge – 1998 jylǵy 1 qańtarda keminde jıyrma bes jyl eńbek ótili bolǵan kezde, áıelderge – 1998 jylǵy 1 qańtarda keminde jıyrma jyl eńbek ótili bolsa», - degen jaýap keldi QazAqparat joldaǵan saýalǵa.
Mınıstrlik usynǵan aqparatta aıtylǵandaı, talap etiletin eńbek ótilinen artyq 1998 jylǵy 1 qańtarǵa deıin jumys istegen árbir tolyq jyl úshin jasyna baılanysty zeınetaqy tólemderiniń mólsheri 1 paıyzǵa ulǵaıtylady. Biraq bul jasyna baılanysty zeınetaqy tólemderin esepteý úshin esepke alynatyn kiristiń 75 paıyzynan (142 313 tg) aspaıtyn mólsherde.
«Qazir bazalyq zeınetaqy júıesine qatysý ótili 30 jyl nemese odan joǵary bolǵan jaǵdaıda respýblıkalyq bıýdjet týraly zańda belgilengen eń tómen kúnkóris deńgeıiniń 100 paıyzy (2023 jyly - 40 567 tg) mólsherinde taǵaıyndalady. Bul kórsetkish 5 jyl aralyǵynda (2027 jylǵa deıin) kezeń-kezeńimen 120% -ǵa deıin artady», - dep tolyqtyrdy vedomstvodan.