Elimizde «Basty ról» atty jańa telejoba bastaý alady
ALMATY. 20 qazan. QazAqparat /Názıra Eleýhan/ -Sháken Aımanov atyndaǵy «Qazaqfılm» AQ-y men «NTK» telearnasynyń jáne MG Production prodıýserlik ortalyǵynyń uıymdastyrýymen qazannyń 28-i kúni elimizde «Basty ról» atty jańa telejoba bastaý alady.
Joba uıymdastyrýshylarynyń aıtýynsha, «Basty ról» telejobasy - bul jańa otandyq fılmderge jarııalanǵan ashyq kastıng.
Jobaǵa jasy 16-ǵa tolǵan, óz kúshine senimdi daryndy jandar qatysa alady. Іrikteý birneshe satydan turady. Jobanyń barlyq irikteý kezeńderi men akterlyq sheberlik dáristeri telearnadan kórsetiletin bolady. Sondyqtan da telekórermender synǵa túsken qatysýshylardyń alǵashqy qadamdarynan bastap, basty rólge taǵaıyndalyp, jeńimpaz atalýyna deıingi aýyr joldy teleekrannan kórip-tamashalaı alady. Bolashaq otandyq fılmderdiń basty keıipkerlerin kıno maıtalmandarynan quralǵan ádil-qazylar alqasy anyqtaıtyn bolady.
Uıymdastyrýshylardyń aıtýynsha, joba barysynda qatysýshylar elimizdiń eń úzdik sahna jáne ekran sheberlerinen dáris alýǵa múmkindik alady.
Shara barysynda eń harızmalyq jáne daryndy degen eki qatysýshy akterlyq sheberlikten dáris alýǵa álemdik kınoındýstrııanyń júregi - Hollywood-qa joldama alatyn bolady. Bul tellejobanyń ekinshi úlken syıy.
Baıqaýdyń alǵashqy irikteý kezeńi 28 qazan kúni Astana qalasyndaǵy «Oskar» túngi klýbynda ótetin bolady, al Almaty qalasyndaǵy irikteý 4 qazan kúni «Qazaqfılm» kınostýdııasynda ótkiziledi.
