Elimizde baspana máselesi jasandy ıntellekt arqyly sheshilýi múmkin

ASTANA. QazAqparat – Qazaqstanda halyqqa arnalǵan áleýmettik kómekti jasandy ıntellekt arqyly júzege asyrý ádisteri qaralyp jatyr. Bul týraly Astana halyqaralyq forýmynda Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aıtty, dep habarlaıdy QazAqparat tilshisi.

Mınıstr jasandy ıntellektti damytý úshin sapaly deńgeıde jınaqtalǵan málimetterdiń qurylymdyq derekter qoryn qalyptastyrý qajet ekenin atap ótti.

«Qazir bizde 400 túrli derekter bazasy bar jáne olardy biriktirýge tyrysyp jatyrmyz. Bul rette biriktirilip jatqan 80 negizgi derekter bazasy bar. Endi biz olardy taldap, nátıjesin shyǵaramyz. Máselen, Qazaqstanda 600 myń adam tıimdi baǵada baspana alýǵa ótinish jasasa, olardyń keıbiri osydan 10 nemese 5 jyl buryn qujattaryn ótkizgen. Biraq biz qazir málimetter bazasyn bir derekter qoryna biriktirdik jáne osy 600 myń ótinishti zerdeledik. Osy oraıda olardyń jarty mıllıonynda páterler bar ekeni anyqtaldy. Olar endi Úkimetten bul qoldaý túrin almaıdy. Degenmen, tıisti qoldaý baspanaǵa muqtaj basqa otbasylarǵa baǵyttalady», - dedi B. Mýsın.

Baǵdat Mýsın Qazaqstan memlekettik qyzmet kórsetýdiń proaktıvti ádisine kóshýge nazar aýdaryp otyrǵanyn aıtty. Bul óz kezeginde Qazaqstan halqyna qandaı qoldaý qajet ekenin túsinýge múmkindik beredi.

«Osyǵan deıin áleýmettik kómek alýǵa júginbegen azamattarǵa 60 000 SMS jiberip, habarlamadaǵy siltemeni basý arqyly osy kómekti alýǵa jaǵdaı jasalatynyn eskerttik. Osy oraıda mundaı tásilder jasandy ıntellekttiń bastapqy múmkindikteriniń biri sanalady. Aldaǵy ýaqytta bul tehnologııalar arqyly taldaý jasaýǵa kóshemiz», - dedi mınıstr.

Budan buryn habarlanǵandaı, elimizde jyl sońyna deıin jasandy ıntellekti damytý strategııasyn jarııalaý josparlanyp otyr.