Elimizde barlyq aqparatty biriktiretin ortaq eńbek bırjasy paıda bolady
ASTANA. QazAqparat - 2017 jyldyń qyrkúıek aıynda Qazaqstanda elektrondyq eńbek bırjasy iske qosylady. Elektrondyq eńbek bırjasy jumyspen qamtý ortalyqtary, izdenýshiler, kásiporyndar, túrli menshik sıpatyndaǵy uıymdar, personal tańdaýmen aınalysatyn rekrýtıng kompanııalary syndy taraptardan keletin aqparatty biriktiredi.
Esterińizge sala keteıik, Úkimet otyrysynda QR Premer Mınıstri Baqytjan Saǵyntaev: «Eger buryn biz «Jumyspen qamtýdyń jol kartasy-2020» baǵdarlamasynyń sheńberinde ýaqytsha jumys oryndaryn qurýǵa basymdyq bergen bolsaq, endi oqytý arqyly turaqty eńbekpen qamtýǵa den qoıamyz. Eń bastysy óz kásibin ashýǵa múmkindik beremiz. Osy arqyly taǵy da jumys oryndary paıda bolady»,- degen edi. Sonyń arqasynda elimizde turaqty jumys oryndaryn ashý boıynsha kóptegen jumystar isteletini týraly da aıtylǵan edi, Tabysy tómen qazaqstandyqtarǵa jeke isin ashý úshin memlekettik qoldaý jasalady. Mundaı múmkindikter Nátıjeli jumyspen qamtý jáne jappaı kásipkerlikti damytýdyń jańa memlekettik baǵdarlamasynyń aıasynda júzege asyrylmaq. Atalǵan is-sharalar Memleket basshysynyń «Qazaqstannyń úshinshi jańǵyrýy: jahandyq básekege qabilettilik» atty 2017 jylǵy 31 qańtardaǵy Qazaqstan halqyna Joldaýynda alǵa qoıǵan tapsyrmalaryn oryndaý maqsatynda, azamattardyń jumys tabýy men jumys berýshilerdiń bilikti qyzmetkerler izdeý úderisin jeńildetý aıasynda júzege asyrylyp keledi.
Nátıjeli jumyspen qamtýdy jáne jappaı kásipkerlikti damytý baǵdarlamasy elimizde 1 naýryzdan bastap, qolǵa alynǵan bolatyn. Onyń basty mindetteri: azamattardyń ózdigimen jumysqa ornalasa alý kókjıegin keńeıtý úshin suranysqa ıe kásipterge jappaı oqytý, nesıelendirý arqyly jappaı kásipkerlikke jaǵdaı jasaý jáne de jumysqa ornalastyrýǵa járdemdesý men eńbekke jumyldyrýdy qoldaý.
Aıta keteıik, Elektrondyq eńbek bırjasy qazir istep turǵan enbek.kz portalynyń negizinde jumys isteıtin bolady jáne memlekettik organdardyń derekter qorymen qamtamasyz etiledi. Búgingi tańda osy kúnge deıin qoldanysta bolǵan ınternet resýrsty jetildirýge den qoıylǵan. Al Eńbek resýrstaryn damytý ortalyǵynyń qyzmetkerleri onlaın-alańqaıdy damytý maqsatynda oǵan tyń tetikter qosýǵa kúsh salýda.
Búgingi tańda, qýantarlyq bir jaǵdaı - Nátıjeli jumyspen qamtýdy jáne jappaı kásipkerlikti damytý baǵdarlamasyn júzege asyrý qolǵa alynǵannan bastap, oǵan 80 myńnan astam adam qatysty. Al olardyń 31 myńy turaqty jumys oryndaryna ornalastyrylyp, 20 myńnan astam jas maman áleýmettik jumys oryndary men jastar tájirıbesine jiberildi. Sondaı-aq, Nátıjeli jumyspen qamtýdy jáne jappaı kásipkerlikti damytý baǵdarlamasyn júzege asyrý aıasynda 29 myńǵa jýyq qazaqstandyq qoǵamdyq jumystarǵa joldandy. 91 arnaıy jobany júzege asyrý aıasynda qysqa merzimdi kýrstarda kadrlar daıarlaý bastaý alyp, jaqyn arada 5 oblysta pılottyq tártipte mobıldi oqý ortalyqtary qatarǵa qosylmaq. Jeke is ashýǵa nemese bıznes órisin uzartýǵa 260 nesıe berilgen.
Sonymen qatar, Qazaqstannyń 5 oblysynda pılottyq tártipte mobıldi oqý ortalyqtary ashylady dep kútilýde. Jumyspen qamtý ortalyqtarynda qyzmet kórsetýdiń jańa standarttary engiziledi. Kórsetiletin qyzmetter sapasyn jaqsartý maqsatynda Astana, Almaty jáne Shymkent qalalarynda elektrondyq kezek engizildi.2017 jyldyń aıaǵyna deıin elektrondyq kezek elimizdiń barlyq oblys ortalyqtarynda engiziletin bolady.
