Elimizde balyq sharýashylyǵyna sýbsıdııa berý erejesi ózgertildi
Nátıjesinde jemge jumsalǵan qarjynyń 30 protsentiniń orny tolady. Alaıda memleketten beriletin sýbsıdııany árbir altynshy kásiporyn ǵana alǵan. Óıtkeni jyl sońynda qarjyny berý jónindegi erejege aıaq astynan ózgeris enip, sharýalardyń kóbi qajetti qujatty jınap úlgermegen. Tuqy balyǵynyń tuqymy tez ósip, salmaq jınaý úshin kem degende kúnine eki ret jem berilýi qajet.
Al jalpy balyqqa berilgen jemniń 30 protsentine memleketten sýbsıdııa berý týraly sheshim 2017 jyly qabyldanǵan. Alaıda ol ýaqytta birde-bir sharýa demeý qarjy almaǵan. Qarjylyq demeý tek 2018 jyly ǵana berile bastady.
«Balyqtarǵa jem teńdeı beriledi. Óıtkeni balyqtyń bári birdeı dárejede ósýi kerek. Al sýbsıdııanyń arqasynda jemdi molaıtamyz. Árıne balyqqa jem neǵurlym kóp berilse, tezirek ósýi men sapasy da soǵurlym jaqsy bolady», - deıdi ósirý pıtomnıginiń dırektory Denıs Mýshtakov.
Elimizde tuqymdyq balyq ósiretin 121 sharýashylyq bar. 2018 jyly 21 sharýashylyq qana demeý qarjy aldy. Sebebi sýbsıdııa berýdiń erejeleri aıaqasty ózgergendikten, balyqshylar qujat daıyndap úlgermegen.
«Biz qazan aıyna deıin sýbısıdııa boıynsha tapsyrysty jazbasha qujat boıynsha qabyldadyq. Qazannan keıin ol toqtatylyp eGov.kz portaly arqyly onlaın qabyldaý júrgizildi. Keıbir sharýashylyqtar tapsyrysty onlaın berdi. Olarǵa jedel qyzmet kórsetildi», - dedi QR AShM orman jáne janýarlar dúnıesi komıtetiniń baspasóz hatshysy Sáken Dildahmet.
Qujattardy tolyq elektrondyq júıege kóshirý týraly sheshim jaqynda ǵana qabyldanǵan. Degenmen balyq sharýashylyǵy mamandary bul salanyń damýyna kedergi keltiretinin aıtady. Óıtkeni osy qujat aınalymynyń kesirinen sýbsıdııany ala almaı otyr.